Од Агенцијата за електронски комуникации (АЕК) најавуваат дека напролет треба да го стават во функција системот за мерење на параметрите на квалитетот на широкопојасен пристап на интернет во фиксните мрежи, со што крајните корисници ќе бидат информирани за квалитетот на таа услуга. Тоа, појаснуваат од АЕК, значи дека секој поединечно ќе може да побара мерење на квалитетот на услугата од својата локација.

Како што информираат од АЕК, паралелно со заокружувањето на набавката на опремата на системот треба да биде изготвен соодветен правилник за методологијата за мерењето.

Освен моменталната информација за квалитетот на услугата што ја добиваат, системот ќе овозможи анонимно споделување на овие информации со другите корисници во Македонија и ќе обезбедува јавно достапни информации за квалитетот на мрежите на операторите во Македонија.

За тековните мерења што ќе ги врши, регулаторот ќе изготвува редовни извештаи што ќе ги објавува јавно.

По стартот на услугата, првично се очекува зголемување на бројот на поплаки од корисниците за квалитетот на услугата, но долгорочно таа треба да придонесе до поголем квалитет и прифаќање на параметрите утврдени од АЕК како репер.

Според податоците од извештаите од вториот јавен состанок на АЕК, Одделот за решавање спорови од крајни корисници на ова регулаторно тело заклучно со третиот квартал лани постапувал по 842 приговори, за 141 помалку во однос на 2016 година, кога имало 983 приговори.

Најголемиот дел од приговорите се врз основа на услуги за говор и интернет во мобилната телефонија, а седум проценти се за говор и интернет во фиксната телефонија.

Најбројни се приговорите на територијата на Скопје, 63 проценти, по што следуваат: Битола со девет проценти, Тетово со четири, Штип, Велес, Кичево и Куманово со по два проценти.

На бројот 190 во Контакт-центарот на АЕК имало 4.544 повици, како и 1.218 пораки. Аналитичкиот приказ според видот на повик покажува дека 39 проценти од обраќањата до Контакт-центарот се реакции за износот на сметката, 25 проценти за лоша услуга, 24 проценти за консултација за жалбена постапка.