Афера „Галеника“: Уапсен сопственикот на српската леарница „Јеремиќ“, каде се лееја скулптури за „Скопје 2014“
Недела, 19 мај 2013 – Миодраг Јеремиќ, сопственикот на српската леарница „Јеремиќ“ за мaкедонската јавност позната по тоа што го доби тендерот за леење на голем дел од скулптурите во рамки на проектот „Скопје 2014“ , е меѓу осуммината уапсени во вчерашната полициска акција за случајот „Галеника“ открива „Политика“.
Српскиот весник „Политика“ јави дека осомничените во 2009 и 2010 година со набавката на суровини за фармацевтската компанија, со купување и продажба на споменици и лекови ја оштетиле „Галеника“ за 12 милиони евра. Според „Политика“, „Галеника“, без да ја почитува процедурата, купила од Јеремиќ 12 споменици, чија цена ја надминувала реалната вредност и до 20 пати. Сопственикот на леарницата и неговите соработници заработиле 70 милиони динари, а „Галеника“ била оштетена за 200 милиони динари.
Покрај Јеремиќ, уапсени се и генералниот директор на Галеника, сопственици на други фармацевтски компании, шпедитерски фирми, судски вештак и проценител.
Леарницата „Јеремиќ“ е присутна на пазарот во Македонија, откако успеа во рамките на реализацијата на проектот „Скопје 2014“, на меѓународен тендер, во конкуренција со Италијанци и Хрвати, да добие голем дел од планираните проекти.