АКРМ ќе изготви автентично толкување на Тарифата за награда и надоместок на трошоците за работа на адвокатите
Четврток, 30 април 2015 – Адвокатската комора на Република Македонија (АКРМ) закажа посебна седница на Управниот одбор на која ќе се изготви автентично толкување на Тарифата за награда и надоместок на трошоците за работа на адвокатите и притоа ќе се разгледуваат повеќе спорни прашања.
На седницата, прецизираат од АКРМ, ќе се разгледуваат следниве прашања:
- Правото на надоместок на сите трошоци утврдени со АТ;
- Досудување на патни трошоци за адвокат чие седиште е надвор од општината каде што се наоѓа седиштето на надлежниот суд;
- Непризнавање на награда за состав на трошковник;
- Досудување на трошоци за застапување за одржано посебно рочиште за донесување и објавување на пресуда.
Од Комората истовремено ги повикуваат сите адвокати кои имале други проблеми или негативни искуства во практичната примена на Тарифата за награда и надоместок на трошоците за работа на адвокатите да се обратат до Комората најдоцна до 4 мај (понеделник).
„Се повикуваат сите колеги кои имале други проблеми или негативни искуства во практичната примена на Тарифата за награда и надоместок на трошоците за работа на адвокатите, да се обратат до Адвокатска комора на Република Македонија на е-маил. lawyermk@mba.org.mk, најдоцна до 04.05.2015, како истите би биле разгледани на седницата и опфатени со Автентичното толкување на АТ“, се вели во соопштението на АКРМ.