Директорот на Народниот музеј во Велес осомничен за кражба на две сребрени монети
Вторник, 10 септември 2013 – МВР поднесе кривична против П.К. (46), директор на Народниот музеј од Велес, под сомнение дека ги украл двете стари монети, кои пред два месеца исчезнаа од институцијата. Кражбата се случи на 16 јули оваа година.
Полициската истрага го опфатила и директорот П.К, откако отисоците од лице место се совпаднале со неговите отисоци.
Монетите биле од времето на Александар Македонски, нивната вредност на пазарот се проценува на околу 12 илјади денари. СВР Велес против П.К. поднесе кривични пријави за кражба и за злоупотреба на службена положба и овластување. Освен двете монети тетрадрахми од времето на Александар Македонски, била украдена и белезица, сопственост на вработена, која ги чувала заедно со монетите во сефот. Осомничениот бил повикан во велешката полиција и таму го признал делото, а по неколку дена ги вратил монетите, со образложение дека бил собирач на стари пари, па сакал во неговата колекција да ги има и овие. При кражбата, директорот ја отклучил вратата од канцеларијата на вработената, која тогаш била службено отсутна, па го отклучил бирото каде што бил сефот, за на крај да го отвори и него и оттаму да ги земе двете монети и да си ги однесе дома. По пријавата за кражбата, директорот во изјава за медиумите побара полицијата да го најде сторителот и остави надлежните да ја расчистат оваа кражба. По ова, градоначалникот на Општина Велес, Славчо Чадиев, под чии ингеренции е именувањето на директорот на ова локална институција, најави дека штом официјално ќе ја добие информацијата од велешката полиција, ќе изврши смена на директорското место во Народниот музеј во Велес. П.К. е дипломиран археолог и на оваа позиција е од април 2010 година.