/ Прочитано:

1.463

(ФОТО) ДЕН НА ПРАВОСУДСТВОТО: Основниот суд Скопје 1 ги отвори вратите за студентите од „Јустинијан Први“

Вторник, 31 март 2015 – Македонското правосудство денеска, 31 март, го одбележува Денот на правосудството. По овој повод Основниот суд Скопје 1 традиционално ги отвори вратите за студентите од Правниот факултет „Јустинијан Први“.

Студентите имаа можност да се запознаат со работата на Судот и на судиите. На нивните прашања, кои главно се однесуваа на спроведувањето на  новиот Закон за кривичната постапка во практиката, одговараше судијката Александра Ристеска.

„Теоријата и практиката се како две страни на една паричка, значи, не одат едно без друго“, вели Бобан Величковиќ, одговорен за групата студенти од магистерските студии по казнено право.

Величковиќ,  кој во иднина се гледа себе си како обвинител, истакнува дека и во изминатиот период имале можност да присуствуваат на судења.

„Оваа соработка треба да се зајакнува и да се негува и во иднина. Ние, покрај денешниот ден, и во изминатиот период бевме во посета на судењата и на рочиштата, при што осознавме и видовме како всушност теоријата заживува во практика. Исто така сакам да изразам благодарност и за другите чинители во правосудниот систем, мислам на обвинителите и на адвокатите коишто во текот на судењата беа отворени за соработка и за одговори на нашите прашања. Сметам дека ваквата соработка треба да продолжи и во иднина и се надевам дека Основниот суд Скопје 1 како и досега ќе ни излегува во пресрет, сè со цел креирање и генерирање на стручен, професионален и квалитетен кадар којшто во иднина ќе биде дел од овие институции“, вели тој.

31 март 1945 година –  поставени на темелите на судството во Република Македонија

Формирањето на првите редовни цивилни судови во Македонија почнува со донесувањето на Одлуката на Второто заседание на АСНОМ од 2 август 1944 година, за формирање на судски органи и поверенство за судство, како и судски оддели при народноослободителните одбори и нивните задачи.

На 20 октомври 1944 година е донесено Решение на Президиумот на АСНОМ во кое со точка 12 се предвидува дека до целосното уредување на правосудството во Македонија судењата ќе се вршат во рамките на народноослободителните одбори. За разлика од револуционерните судови, судовите на партизанските одреди во овој период се јавуваат како хибриден вид правосудни органи кои, иако формирани од НОВ на Македонија, сепак, се карактеристични по две нешта, и тоа: првпат станува збор за правосудни органи засновани со акт на законодавно тело, и за органи кои се одвоени од воената структура, доминантна во сите сфери на живеењето во тој период.

На 31 март 1945 година е донесена Повелба на АСНОМ за устројството на редовните народни судови на Федерална Македонија и Решение на АСНОМ за создавање на Суд за судење на престапи против македонската национална чест. Со Повелбата се основани 25 околиски судови, 3 обласни судови со седишта во Скопје, Штип и Битола, и Врховен суд со седиште во Скопје. Поради ова, 31 март 1945 година се смета за ден на основање на судовите, односно за поставување на темелите на судството во Република Македонија.

 Е. П.