Сепак, назадувањето, се вели во Извештајот, продолжи и ова создава сериозна загриженост. Реформите од минатата декада продолжија да бидат поткопувани од политичкото мешање во работата и назначувањата во судството.

Немаше напредок во однос на минатогодишните препораки или во однос на нерешените прашања што веќе беа утврдени во претходните извештаи и во „Итните реформски приоритети“. Не смее да се попречува работата на Специјалното јавно обвинителство.

Земјата, се вели во Извештајот, треба особено: да ги деполитизира системите за назначување и унапредување во практика, не само во закон и да обезбеди целосна поддршка и ресурси за Специјалното јавно обвинителство.

Според Извештајот, Република Македонија треба да спроведе и реформа на системот за дисциплински мерки и разрешување на судиите, во согласност со препораките на ЕУ и Венецијанската комисија и да развие сериозна стратегија за судска реформа и акциски план кои ќе одговорат на преостанатите недостатоци на одржлив начин.

Подобрувањето на стратешкото планирање, процената на потребите, управувањето и распределбата на ресурси во рамките на судството, вклучително и во рамките на Министерството за правда, исто така се нотирани во Извештајот.

Во Извештајот се нагласува и дека во Република Македонија немало напредок во обезбедување на функционална независност на правниот систем и продолжиле известувањата за селективна правда во определени високопрофилни или политички чувствителни судски предмети. Етичките кодекси за судии (2006) и обвинители (2004) се воспоставени, се вели во Извештајот, но има малку докази за ефикасно следење на усогласеноста.

„Интернет пристапот до судската практика, а особено можноста за пребарување треба да се подобрат во согласност со ’Итните реформски приоритети‘. Сè уште е потребна постојана обука за да се подобри образложеноста на судските одлуки. Поттикнувањето на распоредување национални судии во ЕСЧП е помеѓу ’Итните реформски приоритети‘. Во однос на алтернативното решавање спорови, мала е искористеноста на опцијата за медијација. Земјата е набљудувач во Европската мрежа за судска обука“, се посочува помеѓу другото во Извештајот на Европската комисија за Република Македонија за 2016 година.

M.В