Казните да се изрекуваат кога намерно се прават повреди на прописите поради прибавување корист со сторување на повредата и/или со тоа намерно се предизвикуваат штетни последици, велат од Стопанската комора на Република Македонија, која го презентираше извештајот од спроведеното анкетно истражување за инспекцискиот надзор во компаниите.

„Во периодот во кој се спроведуваше анкетното истражување, добиени се одговори од 440 компании различни по големина според бројот на вработени и според приходот остварен во последната финансиска година, како и од различни стопански дејности, со најголемо учество на компании од индустријата, градежништвото, транспортот и шпедицијата, текстилно-кожарскиот сектор, информатиката и компјутерското програмирање, металургијата, енергетиката, угостителството и туризмот и комуналната дејност. При тоа, 93 % од анкетираните компании имаат искуство со инспекциски надзори во нивното работење“, вели Билјана Пеева-Ѓуриќ од Стопанската комора на Македонија.

Во анализираниот период Државниот инспекторат за труд вршел најчеста контрола, со учество од 28 %; потоа следуваат Управата за јавни приходи и Државниот инспекторат за животна средина, со по 12%; а најмалку, со 1 %, вршеле контрола Агенцијата за лекови, Управата за сигурност во железничкиот систем, Државниот архив, Министерството за економија (концесии) и Државниот управен инспекторат.

Според одговорите на анкетираните компании, Државниот инспекторат за труд најчесто спроведувал надзор, што претставува учество од 38 % од одговорите, по што следуваат Државниот инспекторат за техничка инспекција со 11 %, Државниот инспекторат за животна средина и Агенцијата за храна и ветеринарство со 9 %.

Најчести санкции изречени од инспекциските органи спрема анкетираните претпријатија се: опомените, со 67 % застапеност; глоби само во 30 % од случаите, додека привремена забрана за вршење дејност не е изречена кај ниту една компанија која учествуваше во анкетата.

M.В