/ Прочитано:

714

ГРЦИЈА: Нема ограничувања за странските туристи при повлекување пари од банките

Понеделник, 29 јуни 2015 – Грчката влада синоќа порача дека нема да има ограничувања за странските туристи при повлекувањето пари од банките во земјата.

Истовремено, властите во Атина одлучија дека туристите што престојуваат во Грција и сопствениците на кредитни картички издадени во други земји нема да бидат погодени од мерките за контрола на капиталот.

„Секој што ќе ја посети или што планира да ја посети Грција нема да биде погоден од мерките за контрола на капиталот кои се воведени пред неколку часа и тие нема да се однесуваат на посетителите што сакаат да извршат трансакции или да повлечат пари со картичка издадена во нивната земја“, се вели во соопштението на грчката влада.

Грчкиот Совет за финансиска стабилност синоќа предложи банките во Грција да останат затворени во следните шест работни дена, а од вторник од банкоматите максимално да може да се повлечат по 60 евра дневно.

Премиерот на Грција, Алексис Ципрас, претходно соопшти дека банките одреден период ќе бидат затворени и ги обвини европските партнери и Европската централна банка дека вршат притисок врз Грција.

Тој најави дека ќе биде спроведена контрола на капиталот откако Грците, на неговиот ненадеен повик на референдум за барањата на кредиторите за реформи со кои се условува финансиската помош за земјата, одговорија со масовно повлекување пари од сметките. Сепак, тој дополни дека тоа нема да ја поколеба Владата да го спроведе најавениот референдум следната недела.