/ Прочитано:

623

Хелсиншкиот комитет започна со надгледување на работата на Уставниот суд

Вторник, 31 март 2015 – Хелсиншкиот комитет од 25 март годинава започна со спроведување на проектот „Надгледување на работата на Уставниот суд и процена на неговиот капацитет да постапува по уставни жалби“.

Целта на проектот, кој ќе трае до јули 2016 година, е зајакнување на независноста, непристрасноста и легитимноста на Уставниот суд преку надгледување на неговата работа и научно истражување за изнаоѓање на најсоодветниот систем за воведување на уставната жалба како можен нов институт во македонскиот правосуден систем.

Невообичаено пасивизирање во работата на Судот

„Според годишните извештаи на Уставниот суд, во периодот од 2011 до 2013 година Судот бележи намален број на примени и завршени предмети, намален број на укинати и поништени одредби од закони и подзаконски акти, намалување на годишниот буџет и намалување на бројот на поднесени уставни иницијативи од страна на граѓанските организации. Бројот на примени предмети е во постојан пад и споредено со 2011 г. кога биле примени 236, во 2013 г. примени се 170 предмети (-39%). Споредбата за истите години по однос на завршени предмети е 231/142 (-62%) и укинувачки/поништувачки одлуки 32/14 (-128%). Буџетот на Судот во 2013 г. изнесувал само 498.780 евра, што е за 13% помалку од 2011 г. Од целокупниот буџет дури 74% отпаѓа на плати. Овие негативни индикатори укажуваат на невообичаено пасивизирање во работата на Судот, намалување на довербата кај граѓаните, сомневања за наклонетост кон политиките на законодавната и извршната власт и недостиг на средства за професионален ангажман на Судот. Во Извештајот за напредокот на РМ во 2014 година на Европската комисија се содржани забелешки за составот на Судот, за неговата пристрасност и за пролонгирање на донесувањето на одлуки“, информираат од Комитетот, образложувајќи ги причините поради кои го започнале проектот. 

Главните проектни активности опфаќаат: надгледување и оценување на седниците на Уставниот суд;  бесплатна правна помош за граѓаните кои се обраќаат до Судот; споделување на наоди со јавноста преку објавување статија за секоја седница засебно на веб-страницата на Комитетот; подготовка на сопствени уставни иницијативи и  следење на имплементација на одлуките на Уставниот суд од страна на законодавната и извршната власт.