Четврток 18 септември 2014 – Како наш посветен пријател и партнер, Македонија ја заслужува нашата помош да стане подготвена за членство во НАТО и ЕУ. Во интерес на САД и Европа е да продолжиме да и ја даваме таа помош, вели Џес Бејли, дипломатот номиниран да биде новиот американски амбасадор во Република Македонија, кој говореше во Сенатската комисија за надворешни работи.

Бејли ветува дека ќе го искористи неговото дипломатско искуство да и помогне на Македонија во спорот Грција за да се најде заедничко прифатливо решение за името. Според него, решението на спорот ќе биде клучен чекор кон зголемување на стабилноста и безбедноста на Македонија, Балканот и Европа. Тој додаде дека ќе работи и на охрабрување на сите партии во премостувањето на етничките поделби.

„И додека Македонија развива силни демократски структури, Соединетите држави, Европската унија, други пријатели на Македонија и најважно, самите нејзини граѓани изразуваат загриженост за слободата на печатот, независноста на судството и транспарентноста на владините финансии“, смета Џес Липникот Бејли.

„Ќе работам со водачите и јавноста на реформскиот дневен ред на Македонија, но не само затоа што тоа ќе доведе до напредок во однос на нејзиното членство во европските институции. Слободните медиуми, независното и непристрасното судство и транспарентната влада ја јакнат демократијата и промовираат економски просперитет кон којшто Македонија со право се стреми“, најави Бејли пред Сенатската комисија за надворешни работи .