Жените, без оглед дали се главни или споредни субјекти во рекламите, во повеќето случаи се носители на традиционални улоги и вредности, се вели во Годишниот извештај за имплементација на Стратегијата за родова еднаквост за 2016 година, во однос на прашањето за градењето на култура на еднакви можности и промоција на еднаков третман и недискриминација врз основа на пол.

Во 2016 година, се посочува во извештајот,  Агенцијата за аудио и аудиовизуелни медиумски услуги презентираше резултати од спроведените анализи на рекламите во Македонија.

Според показателите, постои изедначеност во присуството на жени и мажи во својство на главни ликови во рекламните спотови со истовремено забележително присуство на девојчиња и момчиња во нив (како самостојни носители на содржината или како дополнување на семејната атмосфера и/или асоцирање на семејна, традиционална атмосфера).

Во рекламите најзастапена возрасна група се жените на возраст од 31 до 45 години, потоа следуваат оние на возраст од 18 до 30 години. Мажите, исто така, најчесто се на возраст од 31 до 45 години, по што следуваат оние што припаѓаат на категоријата повозрасни од 46 години. Ова наведува дека категоријата граѓан(к)и на возраст од 31 до 45 години е онаа за која се претпоставува дека е потенцијално најголем консумент на производите/услугите.

Жените, се вели во извештајот, го заземаат клучното место во рекламите што прикажуваат производи наменети исклучиво за жените, но и во оние што прикажуваат производи што ги користат и другите категории потрошувачи.

„Жените, без оглед дали се главни и/или споредни субјекти во рекламите, во повеќето случаи се носители на традиционални улоги и вредности: домаќинки, сопруги и мајки. Во некои реклами имаат неутрални улоги, а во одделни реклами се претставени како декорација.

Забележани се реклами во кои тие го привлекуваат вниманието со својот физички изглед и се заводнички. Забележано е дека во одредени случаи се во деловен амбиент, со изразена посветеност на својот физички изглед, а во две реклами од анализираните, жените имаат афирмативна улога.

Забележливо е дека и кога жените имаат неутрална улога во рекламните спотови, се случува содржината, нарацијата и приказната која го следи спотот да имаат афирмативен однос спрема родовата еднаквост.

Традиционалното претставување на родовите улоги е најчесто при рекламирањето прехранбени продукти, средства за чистење на домот, како и во рекламите кои се наменети за децата“, се посочува во извештајот.

На почетокот од овој месец, Агенцијата за аудио и аудиовизуелни медиумски услуги нотираше и како што нагласија од Агенцијата,  мизогинија и сексизам на програмите на три радиостаници во кампањата за „сите прееманципирани жени“.

Агенцијата констатираше дека кампањата претставува дискриминација врз основа на пол, ширење мизогинија и сексизам, што е флагрантно кршење на Законот за аудио и аудиовизуелни медиумски услуги. Трите радиодифузери кои ја продуцирале оваа кампања се однесуваат на начин кој е непоимлив и целосно неспојлив со професионалното однесување.

Имено, во кампањата еманципацијата на жените и мажите се поставува како два процеса кои меѓусебно се исклучуваат, еманципацијата и стремежот на жените да го достигнат максимумот во своите кариери се претставува како негативна појава, успешните жени се подложуваат на потсмев и омраза, а на децата и младите од обата пола им се испраќа порака дека не се еднакви и дека не треба да се стремат кон еднаквост.

M.В