Во првата половина на октомври 2016 година, Министерство за правда формираше работна група која ќе работи на текстот на новиот Закон за бесплатна правна помош.

„Предлог-одредбите се изработени од страна на Агрис Баталаускис,  експерт од Латвија, во рамките на твининг-проектот за зајакнување на владеење на правото, со посебен фокус на бесплатната правна помош и пристапот до правда. Предлозите, меѓу другото, се резултат на низата состаноци кои ги одржа експертот со Македонското здружение на млади правници, како здружение со долгогодишно искуство и со овластување за обезбедување на бесплатна правна помош“, велат од Македонското здружение на млади правници.

Како членови на работната група, освен претставници од главните сектори на Министерството, се и судии од Основниот суд Скопје 2 Скопје, претставници на Министерството за труд и социјална политика и од Меѓуопштинскиот центар за социјална работа на Град Скопје, од Министерството за внатрешни работи, од Адвокатска комора на РМ и од Македонско здружение на млади правници.

На состанокот, велат младите правници, повторно се истакнаа: потребата од донесување на комплетно нов закон поради бројноста на даватели на правна помош во Македонија, потоа потребата од воспоставување на јасни постапки и јасни прецизни рокови, потребата од воспоставување на функционален систем во кој секоја од засегнатите страни точно ќе ја знае својата улога, како и потребата од обезбедување на правна помош секому кому му е навистина потребна, а не само за оние што немаат можност да си ја дозволат.

М.В