Среда, 17 јуни 2015 – Најчест проблем со кој се соочиле потрошувачите во изминатиот период биле превисоки сметки за електрична енергија, поради често вршење на механичка пресметка на електричната енергија, велат од Организацијата на потрошувачите на Македонија. Потрошувачите се жалеле дека ваквиот начин на мерење им создава голем проблем поради тоа што се случуваат големи отскокнувања во сметките од месец во месец.

„Повторно како и лани, најчест проблем на граѓаните беше сервисирањето на техничките производи, каде што пред сè стануваше збор за проблеми со сервисирање и гаранција на мобилни телефони, а во одреден број и за лаптоп и десктоп компјутери, како и за телевизори и други технички апарати за секојдневна употреба. Проблемите со производите од бела техника и други видови технички производи беше помал. Најчесто потрошувачите се жалеа на проблеми со мали кујнски апарати, клима-уреди и грејни тела“, велат од ОПМ.

Во доменот на производи за домот, поплаките најчесто биле во поглед на изработка и испорака на мебел, каде што потрошувачите се жалеле дека со месеци чекаат производ за кој било договорено да биде испорачан за 30 дена или помалку, или дека производот кој го добиле е со многу лош квалитет, или дека воопшто не соодветствува со порачаното.

 Во доменот на производи за лична употреба, потрошувачите најчесто се жалеле за обувки и облека, особено за проблеми со враќање на овие производи иако биле неупотребени, проблеми со оштетување на производот во гарантен рок и сл.

„За разлика од претходните извештаи, во овој период се забележува зголемен број проблеми со телекомуникациските услуги, особено со користењето на услугите од операторите што нудат телевизиски пакети. Проблемот беше најзастапен во почетокот на 2015-та година, кога дојде до исклучување на дел од програмите во телевизиските пакети. Граѓаните реагираа на ваквите одлуки на операторите кои ги променија каналите што дотогаш ги нуделе. Потрошувачите бараа раскинување на договорите, при што настана проблем поради немањето основ за раскинување, поради тоа што телевизиските пакети т.е. точно наведените канали не беа дел од договорите. ОПМ реагираше до надлежните органи за пронаоѓање на начин за решавање на овој проблем со кој се соочуваат потрошувачите. По реакција на потрошувачите, агенцијата за електронски комуникации донесе правилник со кој операторите се обврзани да склучат нов договор со потрошувачот, каде што ќе се обврзат да исполнат одредени канали кои се во пакетот, а при промена на пакетот, потрошувачот ќе има право да го раскине договорот без да плати казнени пенали“, велат од ОПМ.

Следен најчест проблем со кој се соочиле потрошувачите во изминатиот период биле превисоки сметки за електрична енергија поради често вршење на механичка пресметка на електричната енергија, потрошувачите се жалеле дека ваквиот начин на мерење им создава голем проблем поради тоа што се случуваат големи отскокнувања во сметките од месец во месец.

„ Имено, одреден месец им стигнува сметка поголема за неколку пати, па потоа неколку месеци плаќаат симболични суми (порамнување). Тие велат дека ваквиот начин на наплата им преставува голем проблем во планирањето на семејниот буџет, а особено овој проблем се јавува кај ранливите категории граѓани“, посочуваат од ОПМ.

Понатаму во делот на услугите, најголем дел на поплаки на потрошувачите имало за туристичките аранжмани, особено во периодот по Новата година и за време на празниците.

„Потрошувачите се соочуваа со ненадејно откажување на аранжманите од страна на туристичката агенција, со неисполнување на дел од аранжманот итн.“, велат од ОПМ.

„Во делот на услугите на ниво на Град Скопје, поплаките најчесто се однесуваа на испораката на топлинската енергија, односно одредени реони имаа подолги прекини и потрошувачите не ја добиваа услугата поради дефекти во системот за кои требаше долг временски период да се санираат. Тие во тој период користеа дополнително греење, за што бараа да бидат сразмерно обесштетени“, истакнуваат од ОПМ.

 Во делот на специјалистичките советувања, најголем број поплаки имало во доменот на храната, особено за декларирањето на прехранбените производи.

„Потрошувачите се жалеа дека производите немаат македонска декларација на кирилско писмо, дека се сомневаат во манипулации со гарантниот рок на производот.  Помал дел на поплаки имаше за финансиските услуги, проблеми со кредити и пресметување на камати, или проблеми со трансакциските сметки. Исто така во мал број имаше поплаки за здравствените услуги и домување. Во сите наведени случаи граѓаните беа упатувани на кој начин да го решат проблемот, иако одредени проблемите се јавуваа поради услови кои ги поставуваат регулаторните тела, каде што е потребно тие да преземат активности во согласност со реакциите на граѓаните“, истакнуваат од ОПМ.