Вторник, 7 октомври 2014 – Ексразузнавачот Александар Диневски кој во случајот „Шпион“ беше осуден со казна затвор од 4,5 години од денеска поради незадоволство од пресудата започна штрајк со глад во затворот Шутка каде се наоѓа речиси една година. 

фото: МКД.мк

Диневски на своите најблиски им соопштил дека станува збор за политички монтиран случај поради што тој во знак на протест ќе стапи во штрајк со глад.

Диневски со вчерашната пресуда на скопскиот Кривичен суд беше прогласен за виновен и осуден на 4,5 години за кривичните дела: злосторничко здружување, шпионажа и оддавање државна тајна. Тој во текот на судскиот процес негираше вина.

Со првостепената пресуда за првата македонска шпионска афера изречена од Основниот суд Скопје 1 сите 18 обвинети опфатени во овој предмет беа прогласени за виновни. Највисока затворска казна доби првообвинетиот Марјан Ефремов, кој според Обвинителството, како и првостепениот Суд бил „мозокот“ на групата која  шпионирала за странски разузнавачки служби, а истовремено се занимавала со уценување, измами и изнуди. Нему му беа изречени 15 години затвор за кривичните дела: шпионажа, злосторничко здружување, измама, уцена и прикривање. Останатите затворски казни се движат во распон од една до девет години, а изречена е и една условна казна. Ексгенералот Горан Стојков доби 9 години затвор, но тој револтот јавно го искажа уште во судница.

Поранешниот директор на управата за спречување перење пари Ване Цветанов доби 3 години затвор за  делата злосторничко здружување и злоупотреба на државна, службена или воена тајна.

Меѓу обвинетите е Марјан Маџовски, кој со првостепената пресуда е осуден на една и пол година затвор за кривичните дека злосторничко здружување и уцена.