Понеделник, 11 август 2014 – Граѓаните оваа година се најмногу задоволни од севкупната работа на Централниот регистар, кој е оценет со највисока оценка (5) од 51 отсто од испитаниците. Најниска средна оценка имаат центрите за социјални работи и Одделението за лични документи на МВР, од 3,6.

Тоа се резултатите од Анкетата за задоволството на граѓаните од државните институции, која Министерството за информатичко општество и администрација (МИОА) ја спроведува втора година, според методологијата Барометар на квалитетот на институциите, а првпат годинава е воведен и таен клиент (најмени агенти) кои посетуваат институции и таен клиент преку телефонски јавувања за оценување каков е односот на институциите на телефон.

Најмалку се чека (до пет минути) во Управата за имотно-правни работи, оцениле 78,3 отсто од тајните клиенти, а најдолго се чекало во Катастарот на РМ.

Министерот Иво Ивановски денеска на прес-конференција соопшти дека истражувањата преку анкета и тајни клиенти биле спроведени во јуни и јули 2014, во 11 државни институции и во три општини по случаен избор – Кисела Вода, Свети Николе и Прилеп, како и во подрачни служби во кои има голема фреквенција на граѓани.

Вработените во Централниот регистар добиле најпозитивно мислење од испитаниците (68,3 отсто), а најмалку позитивно мислење имале за вработените во Одделението за издавање лични документи при МВР.

„Најлесно се добиваат информации за предмети на граѓаните во Централниот регистар, а најтешко во Управата за имотно-правни работи. Граѓаните најмалку се препраќаат од шалтер на шалтер во Централниот регистар, а најмногу во центрите за социјални работи. Едношалтерскиот систем најмалку се почитува во Фондот за пензиско и инвалидско осигурување, како и во општините“, истакна Ивановски.

Хигиенските услови се најдобро оценети во Царинската управа, а најмалку во Фондот за здравствено осигурување. Царинската управа е и најпристапна за лица со инвалидност, а најнесоодветен пристап има во Фондот за пензиско и инвалидско осигурување.

Подобро од лани е оценета услужноста на Управата за јавни приходи, Централниот регистар и Царинската управа.

Од трите оценувани општини, граѓаните биле најзадоволни од Прилеп, а најмалку од Свети Николе, а во телефонски јавувања најголемо задоволство имало од Свети Николе, а со општината Прилеп тајните клиенти не биле во можност да воспостават контакт.

Иваноски најави дека МИОА ќе направи детален акциски план и ќе има средба со директорите во институциите за да се лоцира одговорноста и да се надминат слабостите. Потсети и на донесениот Закон за прибавување докази и податоци по службена должност од мај 2013 година заради воведување едношалтерски систем во државните институции. Целта е граѓаните да не се препраќаат од една во друга канцеларија за дополнување на предметите.

„Оваа година првпат спроведуваме анкетирање на сите институции дали го почитуваат тоа правило. По деталната анкета, во најголем дел, во просек од 75 отсто од институциите не ги препраќаат граѓаните од едни во други институции. Но, има случаи каде се уште тоа се прави. Затоа, ги потсетувам граѓаните на РМ дека ниту еден службеник, институција или подрачна институција, нема право да ве врати назад за дополнување на вашиот предмет доколку се работи за документ кој го поседува друга државна институција“, рече Иваноски. Ги повика ако се соочиле со таков случај, да се обратат во МИОА или во Државниот управен инспекторат, потсетувајќи дека санкциите се до 15.000 евра.

Оваа година биле направени вкупно 3.300 анкети во подрачните институции, 660 посети на тајни клиенти и дополнителни 90 излезни анкети и 18 тајни клиенти во трите општини. Со нив се прави стандардизирано мерење на квалитетот на услугите на институциите и нивно рангирање според добиените резултати, а целта е да се постигне конкурентност, спроведување на планираните реформски процеси во јавната администрација и посервисно ориентирани институции.

Институциите се оценувани по различни аспекти на задоволство од добиените административни услуги, како професионалност и љубезност на вработените, корисност на информациите кои ги добиваат, време на чекање во ред, време на решавање на предметот, праќање од шалтер на шалтер, враќање поради некомплетна документација… а се оценувани и самите објекти – пристапот за инвалидни лица, хигиената, температура, уредност, ознаки на шалтерите, односот на шалтерскиот работник, достапност на формулари, почитување на едношалтерски систем