По барање на членките на Асоцијацијата на осигурително-брокерските друштва при Стопанската комора на Македонија, осигурително-брокерските друштва се стекнаа со право за добивање меродавен технички резултат по издадени полиси за автомобилска одговорност и зелена карта.

„Досегашната практика на добивање на извештајот од осигурителните компании не се покажа како ефикасен начин на работа и таа негативно влијаеше врз професионалноста на осигурително-брокерските друштва и штетно се одразуваше врз клиентите. За таа цел, а во насока на продолжување на соработката помеѓу Асоцијацијата на осигурително-брокерските друштва при Стопанската комора на Македонија и Националното биро за осигурување е усвоено Барањето на Асоцијацијата за добивање на извештајот“, информираат од Асоцијацијата на осигурително-брокерските друштва

Овој извештај, додаваат од Асоцијацијата, е од големо значење за изработка на веродостојна анализа за висината на премијата, како и за подготовка на соодветна тендерска документација, со премија која е во согласност со законската регулатива.

Со доставување на извештај за меродавен технички резултат до осигурително-брокерските друштва, приватните правни субјекти кои имаат возила осигурани во повеќе осигурителни друштва ќе добијат веродостојна информација за основот на кој им се зголемила премијата, односно за кое возило, кога и во која земја е настаната штета.

М.В