/ Прочитано:

1.910

Рочиштето за случајот „Еразмус“ се одложи

Одбраната на обвинетите во случајот „Еразмус“ побара изземање на судијката Љубинка Башеска и на судијата Ивица Стефановски, кои се членови на судечкиот совет, поради што рочиштето беше одложено.

Основен суд Скопје еден Скопје

Судското рочиште за предметот „Еразмус“, во кој за поткуп се обвинети петмина професори и еден асистент од Економскиот факултет во Скопје, кое беше закажано за денеска во Основниот суд Скопје 1 – Скопје, се одложи откако одбраната побара изземање на судијката Љубинка Башеска и на судијата Ивица Стефановски, кои се членови на судечкиот совет.

Имено, според адвокатите на обвинетите во случајот, двајцата судии, односно и Башеска и Стефановски, во претходна постапка веќе еднаш одлучувале по жалба на одбраната и ја одбиле.

Судењето е одложено на неопределен рок, односно сè додека в. д. претседателката на Основниот суд Скопје 1 – Скопје, Татјана Михајлова, не одлучи по барањето за изземање.

Инаку, во случајот „Еразмус“ обвинетите се товарат дека во текот на 2015 и 2016 година, како лица вработени на Економскиот факултет при Универзитетот „Св. Кирил и Методиј“ – Скопје, искористувајќи ја својата положба сториле кривични дела: примање поткуп, примање награда за противзаконито влијание, злоупотреба на службената положба и овластување и давање поткуп.

Обвинетите Б. Ш и С. Р се товарат за сторено кривично дело – Примање поткуп од чл. 357 ст. 1, лицето Д. Ј. се обвинува дека сторило кривично дело – Примање поткуп од чл. 357 ст. 1 и Примање награда за противзаконито влијание од чл. 359 ст. 2 од Кривичниот законик. Обвинетите Љ. Ј. и С. Д. се товарат за сторено кривично дело – Злоупотреба на службената положба и овластување од чл. 353 ст. 1 од Кривичниот законик. Со обвинителниот акт се обвинува и лицето Д. Д. за сторени три кривични дела – Давање поткуп од чл. 358 ст. 1 од Кривичниот законик.

А. Б.