/ Прочитано:

958

СТАВРЕСКИ: И функционерите ќе плаќаат придонеси за хонорари

Среда, 24 декември 2014 – И фунционерите кои остваруваат дополнителни средства како хонорарци ќе плаќаат придонеси, изјави денеска министерот за финансии Зоран Ставрески.

„Мерката ќе важи и за функционерите. За сите договори на дело, авторски договори и други типови  договори, ќе се плаќаат придонеси за пензиско и здравствено осигурување. Ќе ги опфати функционерите кои остваруваат дополнителни средства врз основа на овие договори“, истакна Ставрески, кој додаде и дека мерката за плаќање придонеси од хонорари почнува следната недела, на 1 јануари.

Според Ставрески,  се работи за добра мерка бидејќи ќе овозможи подобра социјална заштита за луѓето коишто примаат хонорари да влезат во системот на здравствена заштита и да ги уживаат сите права од здравствената заштита, како и да можат да остварат пензиски стаж. Тој потенцираше дека не е правично рудари и шивачки во конфекција со по 12.000 плата да плаќаат здравствено и пензиско а некој со ист хонорар да не плаќа.

„Мерката е правична бидејќи ќе овозможи сите подеднакво на отварениот приход да придонесат на системот за здравствено осигурување. Нема ни една причина, шивачките во текстилните фабрики коишто примаат 12.000 денари плата или рударите да плаќаат здравствено осигурување, а некој што преку хонорари остварува 12.000, 15.000 или 50.000 денари да не плаќа здравствено или пензиско осигурување и ќе овозможи сите на еднакво ниво на доход остварен да плаќаат со еднаква стапка придонеси за здравствено и пензиско осигурување“, рече Ставрески, а како пример за ваквата мерка ги посочи Германија, Чешка, Белгија, Данска и сите други ја имаат истата мерка на идентичен начин.