Среда, 17 септември 2014 – Иако денеска беше предвидено да продолжи судењето за исчезнувањето на артефакатите од Музејот на Македонија, тоа не се случи поради немање возила за обвинетите, кои се наоѓаат во притвор, да бидат донесени на Суд.

Затворската управа, како што беше образложено, го известила Судот дека немаат доволно возила за транспорт и од тие причини не биле во состојба да ги спроведат седумтемина обвинети.

Според Обвинителството: Златко Видески, виш кустос и програмски директор во Музејот на Македонија, Сафка Кушовска-Сафитли, ракувач во депо, Перо Јосифовски, екс-директорот на Музејот на Македонија, Јован Кондијанов, Дарко Кржовски и Андреј Ежов, членови на Комисија за откуп на музејски материјал  и златарот Часлав Кузмановиќ, единственото лице што не е вработено во музејските институции, се виновни за исчезнувањето на 162 артефакти од Музејот.

Видески е обвинет за несовесно работење и за оттуѓување на културно наследство, Кушовска-Сафитли за несовесно работење,  Јосифовски за злоупотреба на службената положба и оттуѓување на културното наследство, Кузмановиќ за оттуѓување на културно наследство, додека Кондијанов, Кржовски и Ежов одговораат за злоупотреба на службената положба.

Според одбраната, обвинението е производ на немоќта на органите на прогонот да ги најдат вистинските сторители на кражбата која беше обелодента во ноември минатата година. Обвинителството, пак, тврди дека сите обвинети се сторители на делата за кои се товарат.

Судскиот процес, кој се води според новиот ЗКП, стартуваше на 3 септември.  

Е.П. / pavlovskae@akademik.com.mk