/ Прочитано:

4.768

Светот без адвокати е свет без владеење на правото – Хрватската адвокатска комора го одбележа Денот на хрватските адвокати

Хрватската адвокатска комора го одбележа 17 март - Ден на хрватската адвокатура. Светот без адвокати е свет без владеење на правото, беше нагласено на свечениот настан.

Роберт Траваш, претседател на Хрватската адвокатска комора, нагласува дека само со независна адвокатура и етичко вршење на адвокатската служба може да се зачуваат правниот систем и остварувањето на правата на граѓаните.

„Адвокатурата е и мора да биде потполно независна професија затоа што само независниот адвокат е гаранција за остварувањето на правата на граѓаните. Адвокатот секогаш мора да внимава на Кодексот на адвокатската етика и секогаш да биде заштитник на граѓаните чии права се загрозени и нарушени. Никој од нас адвокатите не може подобро да ги знае комплицираните, неусогласени и бројни закони и прописи“, вели претседателот на Хрватската адвокатска комора.

Траваш предупредува на нееднаквата положба на адвокатите во земјите членки на ЕУ во можноста за давањето на адвокатската помош и услуги на единствениот европски пазар. Ваквото предупредување Траваш го истакна и при одбележувањето на Денот на европската адвокатура, кога нагласи дека „адвокатите не смеат да бидат слуги на лоши господари“.

Хрватска, истакнува Траваш, мора да внимава на заштитата на адвокатурата при примената и толкувањата на ЕУ-директивите и во таа насока да води сметка за она што претставува адвокатурата како служба и заштитник на правата на граѓаните.

До нелогичности и аномалии, смета претседателот на Хрватската адвокатска комора, доведува, како што вели, бирократската примена на Директивата за услугите на европскиот пазар која промовира и регулира некритична либерализација на адвокатската дејност.

Мора да се внимава, образложува Траваш, на традицијата на нашето право и на нашиот правен систем кој му припаѓа на континенталното право и специфичностите на хрватската адвокатура.

Адвокатурата во Хрватска има долга традиција. Како што велат од Хрватската адвокатска комора, првите записи во кои се споменуваат адвокатите се од средновековно потекло, како што е примерот со Винодолскиот закон од 1288 година. Во Далмација корените на адвокатската струка датираат и од времето на Римското Царство. Во континентална Хрватска, образложуваат од Комората, слободата на вршење на адвокатската професија и дејност е призната со Законот за адвокатите од 1929 година, кога се основани осум автономни адвокатски комори, од кои една била Хрватската адвокатска комора.

Младен Класиќ, потпретседателот на Хрватската адвокатска комора, вели дека светот без адвокати е свет без владеење на правото, а без владеење на правото нема ни правна држава.

На настанот на одбележувањето на хрватската адвокатура бил нагласен и проблемот со дехуманизација на адвокатурата и правото од технолошки аспект. Технологијата и разните апликации може да бидат од помош за адвокатите, но не и да ја заменат улогата на адвокатите. Во таа насока, хрватските адвокати предупредуваат на нелогичните трендови во адвокатурата предизвикани од глобализацијата.

Како служба и дејност, адвокатурата во Хрватска е регулирана во Уставот на Република Хрватска. Според официјалните податоци, Хрватската адвокатска комора има околу 6000 членови. Примарна цел на Комората се заштита и зачувување на самостојноста и независноста на адвокатурата, како и грижа за организирањето и образованието на членовите на Комората, а и соработката со хрватските и меѓународните правосудни тела.

Претседателот на Адвокатската комора на Хрватска, Роберт Траваш, кој е адвокат со над дваесетгодишно искуство, е избран за прв човек на Комората во 2012 година. Од 2009 до 20012 година беше потпретседател на Комората. Покрај вршењето на адвокатска дејност, во биографијата на Траваш е наведено дека бил и советник во хрватската Влада и кабинетот на претседателот на Република Хрватска, а работел и како советник во американскиот Конгрес.

М.В