Со првостепената пресуда за првата македонска шпионска афера изречена од Основниот суд Скопје 1 на 06.10.2014 сите обвинети опфатени во овој предмет беа прогласени за виновни. Највисока затворска казна доби првообвинетиот Марјан Ефремов, кој според Обвинителството, како и првостепениот Суд бил „мозокот“ на групата која  шпионирала за странски разузнавачки служби, а истовремено се занимавала со уценување, измами и изнуди. Нему му беа изречени 15 години затвор за кривичните дела: шпионажа, злосторничко здружување, измама, уцена и прикривање. Останатите затворски казни се движат во распон од една до девет години, а изречена е и една условна казна.

Според обвинителството, откако првообвинетиот добил отказ  од Агенцијата за разузнавање, во 2009 година, формирал злосторничка група во која влегле поранешни или сегашни вработени во УБК, Јавна безбедност, Агенцијата за разузнавање, воената полиција, Државниот архив и сопственици на медиуми.

Според Јавното обвинителство, но и Судот, Марјан Ефремов е „мозокот“ на мрежата што шпионирала за странски разузнавачки служби, меѓу кои грчката и унгарската тајна служба, а истовремено се занимавала со уценување, измами и изнуди на македонски бизнисмени. Обвинетите, како што се вели во обвинителниот акт, користејќи ја својата службена положба, собирале информации и документи со класифициран карактер и му ги предавале Ефремов. Обвинението објаснува дека првообвинетиот потоа преку специјални сателитски оперативни техники, како и преку непосредни средби ги доставувал до лицата кои работеле за странски разузнавачки служби.

Ефремов е инаку брат на велешкиот јавен обвинител, Ивица Ефремов, кој, пак, како обвинет се јавува во случајот „Ликвидација“.

Исто така во обвинението е наведено дека обвинетиот Ефремов контактирал и одржувал средби со политичари, пратеници и министри од кои прибирал информации за важни политички прашања за кои биле заинтересирани странските разузнавачки служби. Негова задача била и изготвувањето на планот за лица кои треба да бидат предмет на уцена или измама, а исто така негова одлука била и висината на хонорарите на припадниците на групата, во зависнот од тоа што ќе сработат.

Меѓу обвинетите провејуваат и имиња добро познати во јавноста: ексгенералот поранешната Единица за брза интервенција “Лавови” Горан Стојков, поранешниот шеф на кабинет на собранискиот спикер Трајко Велјаноски, Марјан Маџовски, поранешниот директор на Управата за спречување на пари и корупција, Ване Цветанов, новинарот и сопственик на „Буревесник“, Зоран Божиновски.

Со првостепената пресуда на Стојков му беше изречена затворска казна од 9 години, но за делата злосторничко здружување, изнуда, недозволено изработување, држење и тргување со оружје или распрскувачки материи и послужување во службата. Цветанов доби вкупно 3 години затвор за делата злосторничко здружување и злоупотреба на државна, службена или воена тајна. Судот не го осуди Цветанов за шпионажа, бидејќи Јавното обвинителство во завршен збор го повлече обвинувањето за тоа кривично дело. Маџовски, пак со првостепената пресуда е осуден на една и пол година затвор за кривичните дека злосторничко здружување и уцена.

Новинарот Зоран Божиновски беше уапсен во Србија, Нови Сад, но тамошниот суд ја усвои неговата  жалба и го напушти екстрадициониот притвор каде помина 11 месеци со обврска на секои 15 дена да се јавува во тамошната полициска станица. Како гаранција дека нема да ја напушти земјата, му е одземена и патната исправа. Екстрадиционата постапка за него и понатаму продолжува, како и постапката за политички азил.

Судијата Ѓоко Ристов, кој го водеше предметот, пред изрекување на пресудата посочи дека има бројни цврсти докази кои укажуваат дека обвинетите ги сториле кривичните дела. Тој нагласи дека првообвинетиот Ефремов водел многу прецизна евиденција за сите дејствија, па оттука се најдени текстови, снимки и скајп комуникации, во кои обвинетите меѓу себе се идентификувале со шифри како: „пајак“, „зубар“, „студеничани“ и „мачор“. Судијата Ристов, во своето образложение исто така  наведе дека  Ефремов документирал и дека имал средби  со припадници на ЦИА, но и средби со лица во Руската амбасада во Србија.  Според доказите и изјавите на обвинетите, информациите чинеле по 600-700 евра.

Судскиот процес за првата македонска шпионска афера стартуваше на 27 јануари година. За неколку лица опфатени со обвиниението, во текот на судењето постапката беше издвоена.

Со пресудата на Основниот Скопје 1:

1. Марјан Ефремов е огласен за виновен за кривичните дела Злосторничко здружување од член 394 ст.1, Шпионажа член 316 ст.3 в.в со чл.45, Измама член 247 ст.3 в.в со ст.1, Уцена член 259 ст. 2 в.в со ст.1 и член 45, Шпионажа од член 316 ст.1. в.в со член 45, Прикривање член 261 ст.3 в.в ст.1 од КЗ и му определена единствена казна затвор во траење од 15 години.

2. Иџет Абди е огласен за виновен  за кривичните дела Злосторничко здружување од член 394 ст.1, Шпионажа член 316 ст.3 в.в со чл.45 од КЗ и му е определена единствена казна затвор во траење од 4 години.

3. Алексо Ангеловски е  огласен за виновен за кривичните дела Злосторничко здружување од член 394 ст.1, Шпионажа член 316 ст.3 в.в со чл.45 од КЗ и му е  определена единствена казна затвор во траење од 4 години.

4. Мирослав Зафировски е огласен за виновен за кривичните дела Злосторничко здружување од член 394 ст.2, Шпионажа член 316 ст.3 в.в со чл.45 од КЗ и му определена единствена казна затвор во траење од 3 години и 6 месеци.

5. Благоја Цветановски е огласен за виновен за кривичните дела Злосторничко здружување од член 394 ст.2, Шпионажа член 316 ст.3 в.в со чл.45 од КЗ и му е определена единствена казна затвор во траење од 3 години и 6 месеци.

6. Миќо Насковски е огласен за виновен за кривичните дела Злосторничко здружување од член 394 ст.2, Измама член 247 ст.3 в.в со ст.1, Уцена член 259 ст.2 в.в ст.1и в.в со член 45 од КЗ и му  е определена казна затвор во траење од 4 години.

7. Горан Стојков е огласен за виновен за кривичните дела Злосторничко здружување од член 394 ст.2, Изнуда член 258 ст.2 в.в со ст.1, Недозволено изработување, држење и тргување со оружје или распрскувачки материи член 396 ст.1, Послужување во службата член 356 в.в со член 23 од КЗ и му е определена единствена казна затвор во траење од 9 години.

8. Марјан Маџовски е огласен за виновен за кривичните дела Злосторничко здружување од член 394 ст.2 , Уцена член 259 ст.2 в.в со член 19 од КЗ и му определена единствена казна затвор во траење од 1 година и 6 месеци.

9. Слободан Милошевски е огласен за виновен за кривичните дела Злосторничко здружување од член 394 ст.2 , Уцена член 259 ст.2 в.в со ст.1 од КЗ му e определена алтернативна мерка –Условна осуда во траење од 2 години која нема да се реализира доколку во следните 5 години не стори ново кривично дело.

10. Влатко Стаматовски  е огласен за виновен за кривичните дела Злосторничко здружување од член 394 ст.2, Одавање државна тајна член 317 ст. 2 в.в со со член 45, Изнуда член 258 ст.2 в.в со ст1. од КЗ и му определена единствена казна затвор во траење од 3 години и 6 месеци.

11. Ване Цветанов е огласен за виновен за кривичните дела Злосторничко здружување од член 394 ст.2, Злоупотреба на државна, службена или воена тајна член 360 – а ст.2 в.в со ст.1 од КЗ и му е определена единствена казна затвор во траење од 3 години.

12. Александар Диневски е огласен за виновен за кривичните дела Злосторничко здружување од член 394 ст.2, Одавање државна тајна член 317 ст. 2, Шпионажа член 316 ст.3 в.в со чл.45 од КЗ и му е определена единствена казна затвор во траење од 4 години и 6 месеци.

13. Ацо Вучиниќ е огласен за виновен за кривичните дела Злосторничко здружување од член 394 ст.2 , Уцена член 259 ст.2 в.в со ст.1 од КЗ и му е определена единствена казна затвор во траење од 2 години и 6 месеци

14. Цветан Дамјановски е огласен за виновен за кривичните дела Злосторничко здружување од член 394 ст.2 , Уцена член 259 ст.2 в.в со ст.1 од КЗ, Недозволено изработување, држење и тргување со оружје или распрскувачки материи член 396 ст.2 од КЗ и му е определена единствена казна затвор во траење од 6 години и 6 месеци.

15. Живко Петровски е огласен за виновен за кривичните дела Злосторничко здружување од член 394 ст.2 , Уцена член 259 ст.2 в.в со ст.1 од КЗ и му е определена единствена казна затвор во траење од 2 години.

16. Тоше Кушиновски е огласен за виновен за кривичното дело Шпионажа член 316 ст. 3 в.в со член 45 од КЗ и му е определена единствена казна затвор во траење од 3 години.

17. Георги Хаџи Мицев го огласи за виновен за кривичното дело Послужување во службата член 356 од КЗ и му е определена единствена казна затвор во траење од 1 година.

18. Кирил Соколов го огласи за виновен за кривичното дело Шпионажа член 316 ст. 3 в.в со член 45 и в.в со член 24 од КЗ и  му е определена единствена казна затвор во траење од 3 години.

Тек на судењето

• 06.10.2014 – ПРЕСУДА „ШПИОН“: Највисоки затворски казни за ексразузнавачот Ефремов и поранешниот генерал Стојков
• 19.09.2014 – СУДЕЊЕ „ШПИОН“: Обвинетите ги дадоа завршните зборови, пресуда на 6 октомври
• 27.08.2014 – СУДЕЊЕ „ШПИОН“: Проговори првообвинетиот, но зад затворени врати за јавноста
• 20.08.2014 – СУДЕЊЕ „ШПИОН“ – ЗАВРШНИ ЗБОРОВИ НА ОДБРАНАТА: Обвинителството не презентираше докази
• 14.07.2014 – СУДЕЊЕ „ШПИОН“ – ЗАВРШНИ ЗБОРОВИ НА ОДБРАНАТА: Обвинетите не издавале државни тајни, тврдат адвокатите
• 08.07.2014 – СУДЕЊЕ „ШПИОН“ – ЗАВРШНИ ЗБОРОВИ НА ОДБРАНАТА: Нема докази за шпионажа, тврди адвокатот на првообвинетиот
• 04.07.2014 – СУДЕЊЕ „ШПИОН“: Обвинителството ги даде завршните зборови, повлечено обвинението за шпионажа за Ване Цветанов
• 02.07.2014 – СУДЕЊЕ „ШПИОН“: Судскиот процес пред финиш, првообвинетиот првпат ќе проговори во завршниот збор
• 25.04.2014 – СУДЕЊЕ „ШПИОН“: Претресот денеска затворен за јавноста — се изведуваа докази прибавени со ПИМ мерки
• 24.04.2014 – СУДЕЊЕ „ШПИОН“: Сведокот Денесовски со тешки обвинувања кон актуелни политичари и новинари
• 14.03.2014 – СУДЕЊЕ „ШПИОН“: Со лаги и евтини трикови уценувале обвинетите, тврдеа бизнисмените Јорданов и Костовски
• 10.03.2014 – СУДЕЊЕ „Шпион“: Еден од обвинетите сметал дека е директен потомок на Александар Македонски
• 21.02.2014 – СУДЕЊЕ „Шпион“: Повлечени материјални докази од предметот
• 18.02.2014 – СУДЕЊЕ „Шпион“: Обвинетите ја негираат уцената покрај аудио снимките што ги направил Марјан Ефремов
• 17.02.2014 – СУДЕЊЕ „Шпион“: Првообвинетиот Марјан Ефремов одлучи да молчи пред судот
• 31.01.2014 – СУДЕЊЕ „Шпион“: Судот ги отвори вратите за исказот на обвинетите за уцена и изнуда
• 29.01.2014 – СУДЕЊЕ „Шпион“: Првобвинетиот пред да се изјасни детално ќе се запознае со доказите во предметот
• 27.02.2014 – СУДЕЊЕ „Шпион“: Обвинението ги опиша мрежата на шпионирање и соработката со странските разузнавачки служби