Понеделник, 3 ноември 2014 – Согласно статистиката за извршени советувања во третиот квартал на 2014 година (месеците: јули, август и септември), заклучно со 30ти септември во Организацијата на потрошувачи на Македонија се јавиле 586 потрошувачи кои побарале некој вид на совет, по пат на телефонски повик, e-mail или лично.

Од советувањата 529 се општо правни а 57 се специјалистички советувања (исхрана, финансиски услуги, права на пациентите и домување). Најголем дел од советувањата биле направени преку телефон, и тоа (70%), па потоа по е-mail (24%) и лично (6%).

„Најголем проблем на кој се пожалија потрошувачите во домен на општо правните советувања, исто како и во првата половина од годинава, е сервисирањето и продажбата на неквалитетни производи, за кои имаше 352 јавувања. Најчесто потрошувачите се жалеа за сервисирање на техничките апарати (35%), а пред сè доминираат мобилните телефони, но имаше и поплаки за телевизори, лаптоп и десктоп компјутери и други технички апарати. Во доменот на поплаки за бела техника (17%) најчесто потрошувачите се жалеа на проблеми со машини за перење, шпорети и рерни за печење“, велат од Организацијата.

Од таму дополнуваат дека за разлика од претходните статистики може да се забележи пораст во делот на жалби на потрошувачите за производи за лична употреба (23%), каде пред сè потрошувачите се жалеа на проблеми при рекламирање на обувки, облека, накит и асесори. Со 14% застапени се жалбите на потрошувачите за производи во домот, а најчесто за мебел, како и во првиот дел од годината.

„Во делот на услугите имаше 73 јавувања, очекувано поради летниот период во кој потрошувачите најчесто користат годишен одмор и заминуваат на некое патување, се забележува голем пораст на поплаките за туристичките патувања (74%). Потрошувачите се соочиле со најразлични проблеми, а најчесто на услугата која ја добиле во хотелот, неисполнети делови од понудата, лажно рекламирање, откажување на патување од страна на туристичката агенција на само неколку дена пред патувањето и т.н. Повторно апелираме потрошувачите кои се соочиле со било каков проблем со туристичкото патување да реагираат со приговор во рок од 8 дена од денот кога се вратиле од патувањето со цел да можат да ги остварат своите права, во спротивно приговорот ќе им биде одбиен. Во делот на јавните услуги на национално ниво имаше 62 јавувања и тоа: испорака на струја (55%), мобилна телефонија (27%), а останатото се однесуваше на поплаки на фиксната телефонија, телевизиски и интернет провајдери. Потрошувачите често укажуваа на тоа дека добиваат паушални сметки за струја кои се повисоки од претходните месеци и се нереални поради тоа што тие месеци за кои е стигната сметката воопшто не биле дома и не била користена електрична енергија. Во делот на мобилната телефонија потрошувачите се жалеа на превисоки цени на сметките за реализиран интернет сообраќај во роаминг и други непредвидени трошоци. Апелираме до сите потрошувачи пред заминување на пат добро да се информираат за цените на интернет сообраќајот доколку користат интернет во роаминг. Доколку не планирате да користите интернет во странство, контактирајте го вашиот мобилен провајдер за да ви биде исклучена опцијата да можете да користите интернет во странство, или целосно да биде исклучен интернетот, со што ќе можете да бидете сигурни дека трошоци од таков вид нема да ви пристигнат на следната сметка.Во делот на јавни услуги на ниво на град Скопје и локална самоуправа имаше 42 јавувања, од кои во најголем дел беа за испорака на топлинска енергија (60%), а имаше и поплаки за водовод и смет, јавниот превоз и паркинг услугите. Потрошувачите се жалеа на големи сметки вон грејна сезона, проблеми со радијаторите или цевките за пренос за топлинска енергија, како и со договорите со претпријатијата кои ја вршат оваа услуга“, соопштуваат од ОПМ.

М.В