Дирекцијата за заштита на личните податоци по службена должност извршила вонреден инспекциски надзор во Државната изборна комисија во однос на објавувањето на личните податоци од Избирачкиот список на нејзината веб-страница, информираат од Дирекцијата.

Поради итноста на наведените состојби, велат од Дирекцијата, биле издадени решенија со кои ѝ се забранува на Државната изборна комисија да обезбедува електронски пристап до личните податоците во Избирачкиот список објавен на веб-страницата https://izbirackispisok.gov.mk/, на начин кој не е во согласност со прописите за заштита на личните податоци.

Имено, во едното привремено решение утврдено е дека објавувањето и електронскиот пристап до личните податоци во Избирачкиот список преку веб-страницата на Државната изборна комисија од страна на неодреден број лица не е правично и не е во согласност со закон и е извршено на начин што не е во согласност со конкретна и јасна законски утврдена цел, спротивно на член 31 став 2 точка 28-в и 28-г од Изборниот законик и член 5 став 1 и став 4 од Законот за заштита на личните податоци.

Во другото привремено решение ѝ се забранува на Државната изборна комисија да објавува на својата веб-страница лични податоци на физички лица (име и презиме, пол, адреса, место и општина, датум на раѓање, податок за иселени лица и број на гласачко место), содржани во Списокот на неконзистентни записи – предмет на теренски проверки, бидејќи Државната изборна комисија нема правна основа да врши обработка преку објавување на лични податоци на физички лица, кои ќе бидат утврдени како неконзистентни записи и ќе бидат предмет на теренски проверки.

Иако на вчерашната седница на ДИК беше договорено спорниот список да биде тргнат тој и денеска сè уште е достапен за преземање од веб-страницата на Комисијата.