Среда, 6 мај 2015 – Министерството за здравство најавува нови дополнувања на Законот за здравствено осигурување во врска со обезбедување континуирано здравствено осигурување на лицата што имаат краткотрајно вработување до 90 работни часа во текот на месецот.

Од Министерството за здравство велат дека лицата со краткотрајни вработувања при секоја одјава во Агенцијата за вработување на Република Македонија имаат обврска да одат во Фондот за здравствено осигурување на Република Македонија и да го менуваат основот на здравственото осигурување.

„Ова предизвикува дополнителни обврски за лицата со краткотрајни вработувања и постојано администрирање на нивниот статус“, образложуваат од Министерството.

Оттаму посочуваат дека основна цел на дополнувањето на Законот за здравственото осигурување е обезбедување континуирано здравствено осигурување на лицата што имаат краткотрајно вработување до 90 работни часа во текот на месецот.

М.В