Пред два дена Државната изборна комисија го стави на јавен увид списокот на 39 502 лица кои се водат како спорни записи во Избирачкиот список и упати јавен повик до нив да се пријават за да го докажат своето право на глас. Заклучно со денес, 28 јули, до 13:00 часот вкупно 257 граѓани извршиле увид во списокот.

„Од нив, 31 лице се пријавиле во подрачните одделенија и канцеларии или во дополнителните канцеларии на Државната изборна комисија, додека 226 граѓани пријавувањето го оствариле преку веб-апликацијата на Државната изборна комисија“, велат од ДИК.

Во текот на вчерашниот ден  можноста за пријавување ја искористиле вкупно 122 граѓани, и тоа лично, во подрачните одделенија и канцеларии на Државната изборна комисија, а во дополнителните канцеларии на Државната изборна комисија вкупно се пријавиле 5 граѓани, додека можноста за електронско пријавување ја искористиле 117 граѓани.

Спорните записи во Избирачкиот список за кои има несовпаѓање на податоците за граѓаните се појавија откако беа извршени вкрстени и теренски проверки.

Можноста за пријавување во ДИК ќе трае до 19 август 2016 година.