Измените на Законот за здравствена заштита на комисиска расправа
На дневен ред на Комисијата за здравство е Предлог-законот за изменување и дополнување на Законот за здравствената заштита, кој е во фаза на второ читање.
Целта на измените и дополнувањата во Законот за здравствената заштита e да се обезбеди внатрешна организација на јавните здравствени установи, која ќе обезбеди достапна, рационална, ефикасна и континуирана здравствена заштита; да се додаде АПТИС како меѓународно признат сертификат за познавање на англискиот јазик и да се избрише психолошкиот тест и тестот на интегритет за директорите на јавните здравствени установи и директорот на Управата за електронско здравство; да се усогласат условите што треба да ги исполнуваат здравствените работници и здравствените соработници за познавање на еден од трите најчесто користени јазици во Европската Унија со Законот за административните службеници; основната плата и делот за успешност да се утврдува согласно колективен договор и да се обезбедат здравствени работници со високо образование во јавните здравствени установи за непречено вршење на здравствената дејност и обезбедување на континуирана здравствена заштита.
Во Законот се содржани следните основни решенија:
- утврдување на облици за внатрешни организациони единици во јавните здравствени установи;
- додавање на АПТИС како меѓународно признат сертификат за познавање на англискиот јазик и бришење на психолошкиот тест и тестот на интегритет за директорите на јавните здравствени установи и директорот на Управата за електронско здравство;
- познавање на еден од трите најчесто користени јазици на Европската Унија (англиски, француски, германски) и активно познавање компјутерски програми за канцелариско работење за здравствените работници и здравствените соработници;
- делот од плата за успешност да се утврдува согласно колективен договор;
- обезбедување здравствени работници во јавните здравствени установи преку преземање од приватните здравствени установи.
М.В