Постојаната анкетна комисија за заштита на слободите и правата на граѓанинот ќе одржи Јавна расправа на тема: Извештај за напредокот на Република Македонија од страна на Европската комисија за 2018 година, со посебен осврт на делот за човековите права.

Во Извештајот на ЕУ се вели дека правната рамка во голема мера е во согласност со европските стандарди, но потребни се понатамошни напори за целосно и соодветно спроведување. Реформите се преземени за да се зголеми усогласеноста со европските стандарди за човекови права.

„Земјата направи важен чекор кон постепено усогласување со стандардите на ЕУ во областа на фундаменталните права со тоа што стана набљудувач во Агенцијата за фундаментални права. Земјата ја ратификуваше Истанбулската конвенција, ја подобри климата за медиумите, работеше на надградба на законодавната рамка за недискриминација и започна со создавање законски услови за воспоставување на надворешен механизам за надзор на полицијата. Сепак, останува загриженоста во врска со ситуацијата во затворите и психијатриските установи. Потребно е да се гарантира постапување по случаите на злосторства од омраза и говор на омраза, спротивставување на родовите стереотипи и зајакнување на телата вклучени во заштитата и промовирањето на човековите права. Слабостите во спроведувањето на стандардите за човековите права и политичките документи продолжуваат да влијаат, пред сè, на најранливите и маргинализирани групи во општеството, вклучувајќи ги лицата со попреченост и Ромите“, се посочува во Извештајот.

Во наредната година, се посочува во извештајот, државата особено треба да преземе конкретни активности за подобрување на состојбата во затворите и другите места на притвор, ефикасно да ги спроведе препораките на Европскиот комитет за спречување на тортура и нечовечко или понижувачко постапување или казнување и да обезбеди соодветно следење на сите случаи на наводни болести – третман.

Потребно е да продолжи со реформата на јавниот радиодифузен сервис и да преземе мерки за поттикнување на развојот на средина за медиуми, со промовирање на објективно и точно известување, и  да го донесе и да почне да го спроведува Нацрт-законот за заштита и спречување од дискриминација, да обезбеди усогласување на другите закони и да го подобри следењето на сите случаи на дискриминација, злосторства од омраза и говор на омраза.

М.В