Хелсиншкиот комитет за човекови права испрати реакција до Јавното сообраќајно претпријатие Скопје за некористењето на звучниот систем на автобуски постојки. Причината за реакцијата се пријавите од лица со оштетен вид и од слепи лица за проблемите со кои се соочуваат при користењето на јавниот превоз во Град Скопје.

Лицата, велат од Хелсиншкиот комитет, посочија дека во ниту еден автобус на ЈСП во кој се возат не се користи звучниот систем на кажување на автобуските постојки и тие не знаат на која станица се наоѓаат и каде и кога треба да се симнат од автобусот, па мора да прашуваат случајни патници.

Хелсиншкиот комитет во својата реакција испратена до ЈСП посочи дека некористењето на звучните автобуски постојки е форма на дискриминација бидејќи лицата со оштетен вид и слепите лица се оневозможени под еднакви услови да ги користат услугите на јавниот превоз поради нивната попреченост.

„Сметаме дека од особено значење е овие лица да можат самостојно и независно да го користат јавниот превоз, без притоа да бараат помош од другите патници. Предност на набавката на новите автобуси беше токму пристапноста за секого, а користењето на веќе вграден звучен систем за автобуски постојки не бара дополнително финансиско вложување бидејќи веќе постои и неговото користење само ќе ги подобри услугите на јавниот превоз на сите патници. На ваквата реакција ЈСП испрати допис до нас, со кој нè информираше дека како претпријатие кое го врши јавниот, градскиот и приградскиот превоз на патници во Град Скопје ќе ги запознае и ќе ги задолжи сите возачи задолжително да го активираат звучниот сигнал за најава на автобуските постојки за да им го олеснат патувањето со автобус на лицата со попреченост“, истакнуваат од Хелсиншкиот комитет.

„Ги повикуваме сите граѓани кои во иднина повторно ќе се соочат со проблем при користењето на јавниот превоз поради некористење на звучниот систем на автобуски постојки, да го пријават тоа во Хелсиншкиот комитет на еден од телефонските броеви 02/3119-073 и 078/252-812“, додаваат од Хелсиншкиот комитет.

М.В