Министерството за финансии објави соопштение и анализа во врска со воведувањето на прогресивниот данок. Соопштението е насловено како „Со праведното оданочување и социјалната реформа до фер општество за сите“.

„Со воведувањето на праведен, прогресивен данок во Македонија ќе се обезбедат дополнителни средства за воведување на минимален гарантиран приход. Со ова, најдоходовните граѓани ќе им помогнат на ранливите категории на граѓани. Најдоходовните 1% граѓани имаат вкупна ефективна даночна стапка која е пониска од онаа на останатите. Затоа, прагот за прогресивното оданочување е поставен за да ја опфати токму оваа група граѓани.

Предлагаме воведување дополнителна стапка од 8% за делот од доходот кој надминува 90.000 денари месечно. Ова значи дека за доходот до 90.000 денари месечно, данокот би останал 10%, како и досега, додека само на делот на доходот кој надминува 90.000 денари би се плаќале дополнителни 8%.

На пример, на месечна даночна основа од 100.000 денари, за 90.000 денари ќе се плаќа данок по стапка од 10%, додека за 10.000 денари ќе се плаќа данок по стапка од 18%. Со ова, за мнозинството граѓани даночната стапка ќе остане иста, 10%. Дополнително, се предлага зголемување на даночното ослободување кај платите и пензиите. Делот на кој не се плаќа данок би се поставил на 8.000 денари. Со тоа се намалува ефективната даночна стапка за лицата што остваруваат доход од плати и пензии, особено оние со ниски примања

Со воведувањето на прогресивниот данок и минималниот гарантиран приход, ќе се намали јазот помеѓу најсиромашните и најдоходовните граѓани.

Дополнително, се предлага различен третман за доходот од труд и доходот од капитал. За доходот од труд, се предлага дополнителна стапка од 8% за делот од доходот кој надминува 90 000 денари месечно. Најголемиот дел од граѓаните живеат од својот труд, при што најголем дел од нив имаат доход под 90.000 денари. За доходот од капитал, пак, се предлага единствена даночна стапка од 15%. Најголем дел од овој доход (имот и дивиденди) завршува кај најдоходовните 1%, и оваа категорија граѓани остварува поголем дел од својот доход од капитал, отколку од труд“, се вели во соопштението на Министерството за финансии.

Анализата за даночната реформа може да се преземе на следните линкови:

Како до праведен даночен систем?

Воведување праведен данок во РМ

Измени на данокот за личен доход: Дополнителна стапка од 8% за делот од доходот кој надминува 90.000 денари месечно

М.В