Македонското здружение на млади правници (МЗМП) го промовираше Годишниот извештај за ефикасноста на правната заштита на човековите права во Република Македонија во 2018 година.

„Објективно и транспарентно презентирање на состојбата за почитувањето и заштитата на човековите права во државата е од примарна важност за Извештајот и тимот на МЗМП. Овој документ се надоврзува на другите национални и меѓународни извештаи посветени на човековите права, но се фокусира на правната заштита. Постоењето на соодветна правна и институционална рамка, која функционира во пракса, е од примарна важност за имплементација на принципите на почитување на човековите права и владеење на правото“, беше истакнато на промоцијата на Извештајот.

Извештајот е изготвен во рамките на активностите на Македонското здружение на млади правници во насока на промоција, унапредување и заштита на човековите права во Република Македонија и се надоврзува на претходно објавените тригодишни извештаи за заштитата на човековите права.

Годишниот извештај за состојбата со човековите права во Република Македонија во 2018 година има цел објективно да ги презентира и да ги документира повредите на човековите права кои МЗМП ги идентификува во тековната година.

Првиот дел од Извештајот содржи опис на повредите на човековите права кои се забележани и документирани од страна на тимот на МЗМП; вториот дел од Извештајот анализира дали и во колкава мера уставните гаранции за заштита на човековите права се покажале како ефикасни во пракса преку студии на конкретни случаи и следење на постапувањето на надлежните органи; третиот дел од Извештајот ги презентира и ги анализира одлуките на ЕСЧП донесени во текот на 2018 година кои се однесуваат на Република Македонија. Извештајот може да се преземе на следниот линк.

М.В