/ Прочитано:

979

РСБСП: Сообраќајниот метеж не дава за право да не се почитуваат правилата

Сообраќајниот метеж стана редовна слика на улиците и патиштата во Македонија.  Во лето, во зима, за празници, за делници. Секој ден, преку целата година, повеќе или помалку – истата слика. Движењето во урбаните средини полека, но сигурно станува мачно, фрустрирачки, за некои дури и депресивно и одбивно.

Постојат многу причини зошто е тоа така. Прво што ни паѓа на памет е јавниот превоз.  Подобар, побрз, поквалитетен јавен превоз ќе ни донесе помалку возила на улиците и патиштата. Не смееме да ја заборавиме и сообраќајната инфраструктура која е направена да ги задоволи потребите, пред сѐ, на моторизираниот сообраќај, додека потребите на пешаците и велосипедистите остануваат занемарени.

Лошите сообраќајни и лошите животни навики го прават сообраќајот невозможен, густ и небезбеден.

Сообраќајниот метеж го отежнува секојдневното движење и секојдневниот транспорт на патници и стока. Поточно, сообраќајниот метеж значи загуба на време, загуба на пари, загадување на животната средина, а неретко е причина и за голем број повредени и загинати лица во сообраќајни незгоди.

Не намалувајќи ја важноста на јавниот превоз и сообраќајната инфраструктура, РСБСП со совети како и зошто да се намали сообраќајниот метеж и како безбедно да се движите во услови на густ сообраќај:

  • Пешачете или возете велосипед. Движете се побрзо и побезбедно. Најголем дел од релациите што секојдневно ги поминуваме во урбана средина се на растојание до 5 километри. Истражувањата покажуваат дека на кратко растојание во урбана средина побрзо и побезбедно ќе се движите доколку го оставите автомобилот и тргнете пешки или со велосипед.
  • Повеќе лица во едно возило. Анализирајќи ја секојдневната слика, можеме да заклучиме дека во Република Македонија најчесто се превезуваат едно или две лица во автомобил. Доколку ја промените таа навика и доколку почесто се групирате по повеќе лица во едно возило, сообраќајниот метеж значително ќе се намали, а патувањето ќе биде побезбедно, побрзо и поевтино.
  • Оставете го автомобилот и заштедете пари. Оставете го автомобилот и на тој начин ќе заштедите на скапо гориво и уште поскап паркинг простор.
  • Јавниот превоз нека биде вашиот прв избор наместо алтернатива. Истражувањата покажуваат дека патувањето со јавен превоз е побезбедно и поевтино отколку користењето на автомобил. Покрај тоа, јавниот превоз нуди можност за одмор, дружење и создавање нови познанства.
  • Намалете ја брзината и држете безбедно растојание. Сообраќајниот метеж изнудува грешки од возачите, затоа намалете ја брзината и држете безбедно растојание за да бидете во можност да избегнете несакани ситуации.
  • Останете смирени и не возете „слалом“. Нервозата, нетрпеливоста и „слалом“ возењето дополнително го зголемуваат сообраќајниот метеж и го загрозуваат безбедното одвивање на сообраќајот.
  • Не користете звучни сигнали непотребно. Звучниот сигнал создава нервоза и паника кај останатите учесници во сообраќајот и создава притисок кој води до непромислено однесување во сообраќајот.
  • Останете концентрирани. Долгото чекање и застојот во сообраќајот доведуваат до пад на концентрацијата кај возачот. Некои возачи во ваква ситуација се склони кон користење мобилен телефон и други помагала. Оставете го мобилниот настрана и останете фокусирани во сообраќајот.
  • Не блокирајте ја крстосницата. И покрај тоа што во одредени ситуации можеби семафорот свети зелено или има знак за првенство на минување, доколку нема реална можност да се движите, ваша обврска како возач е да застанете. Доколку вашето придвижување значи дополнително или целосно блокирање на крстосницата и сообраќајот, не заборавајте дека ваша обврска како возач е да создадете услови сообраќајот безбедно да тече. Подобро да почекате неколку секунди или минута-две, отколку целосно да го блокирате сообраќајот.
  • Секогаш почитувајте ги правилата и прописите во сообраќајот. Сообраќајниот метеж не ви дава за право да поминете на црвено светло на семафорот или да не го почитувате правилото за првенство на минување. Непочитувањето на сообраќајните правила ја загрозува безбедноста во сообраќајот и го зголемува сообраќајниот хаос.

Промената на лошите животни и сообраќајни навики може значително да го намали сообраќајниот метеж и да го направи секојдневното движење полесно и побезбедно.  Вреди да се размисли, вреди да почнеме да се менуваме. Вози одговорно.