Владата на РМ на својата денешна 84. редовна седница донесе одлука Сашо Тасевски  да биде назначен за нов директор на Бирото за јавна безбедност.

Сашо Тасевски e магистер по безбедност и докторанд на Факултетот за безбедност. Во МВР работи од 2001 година. Тасевски на местото директор на Бирото за јавна безбедност доаѓа од  Управата за обезбедување личности и објекти на МВР, со која раководеше.

Тасевски во својата досегашна кариера работел како обезбедување кај поранешниот претседател Бранко Црвенковски, како и кај техничкиот министер за внатрешни работи Оливер Спасовски. На почетокот на кариерата Сашо Тасевски бил припадник на единицата за специјални задачи „Тигар“. Новиот директор на Бирото за јавна безбедност ѝ стана познат на македонската јавност за време на ланските насилства во Собранието кога ги заштитуваше пратениците.

Бирото за јавна безбедност е орган во состав на Министерството за внатрешни работи, кој ги врши полициските работи во Министерството и чија организација и надлежност е уредена со Законот за полиција.  Со работата на Бирото раководи директор кој на предлог на министерот го именува и го разрешува Владата на Република Македонија за време од четири години.