СИТЕ ГРАЃАНИ СЕ ЕДНАКВИ ВО СЛОБОДИТЕ И ПРАВАТА: Втора правосилна пресуда со која се утврдува дискриминација на граничен премин
Апелациониот суд во Битола донесе Пресуда со која ја потврди пресудата на Основниот суд Битола, каде што е утврдено дека тужениот, Министерството за внатрешни работи на Република Македонија, му го повредил правото на слобода на движење на тужителот поради тоа што не му дозволил да ја премине државната граница, со што му биле повредени честа, угледот и достоинството на тужителот, кој е лице од ромска националност.
Судот се повикал на Уставот на РМ според кој сите граѓани се еднакви во слободите и правата, како и Законот за спречување и заштита од дискриминација. Ова е втора правосилна пресуда, поддржана од МЗМП, со која се утврдува дискриминација и ограничување на правото на слободно движење на лицата од ромска национална припадност.
Постапката е поведена во рамките на проектот „Дискриминација на граничните премини“. Случајот го водеше адвокатот Емил Паришко од Битола.
„Иако постојат и други пресуди во РМ со кои се утврдува дискриминација и ограничување на правото на слобода на движење на лицата од ромска национална припадност, во други случаи, во рамките на истите судови, има пресуди со кои за иста или за слична ситуација не е утврдена дискриминација“, велат од Македонското здружение на млади правници. Оттаму истакнуваат дека дел од предметите се процесирани пред Европскиот суд за заштита на човековите права.
Од МЗМП велат дека пресудите со кои се утврдува дискриминација придонесуваат за општествените промени во државата, што е една од целите на стратешкото застапување. Преку позитивната судска пракса граѓаните можат да стекнат поголема доверба во судството и да се охрабрат да бараат заштита на нивните права кога постои дискриминација.
ДВЕ ПРАВОСИЛНИ ПРЕСУДИ СО КОИ СЕ УТВРДУВА ДИСКРИМИНАЦИЈА
М.В