Советот за следење на имплементацијата на Стратегијата за реформи на правосудниот сектор вчера попладне ја одржа својата втора седница. По усвојувањето на записникот од конститутивната седница, Советот го усвои и Деловникот за работа.

Членовите на Советот за следење на имплементацијата на Стратегијата за реформи на правосудниот сектор своите дебати на втората седница ги насочија кон предлог-законите за судовите и за Судскиот совет, за кои заменик-министерот за правда, Оливер Ристевски, појасни дека веќе в среда, по празниците, ќе расправаат пратениците во Собранието на РМ.

Во дискусиите на членовите на Советот акцентот беше ставен на предложените законски одредби што се однесуваат на одговорноста на судиите, како и на предложените членови во предлог-законот кои се однесуваат на нивната заштита, а сè со цел да се постигне што поголема независност на судството и враќање на дигнитетот на судиите.

Заложбите на членовите на Советот за реформи е во склад со извештајот на Прибе, во кој се сугерира судиите да се оценуваат исклучиво врз основа на донесените пресуди.

Членовите на Советот имаа одредени забелешки и за Предлог-законот за Судскиот совет на Република Македонија.

На вчерашната втора седница на Советот за следење на имплементацијата на Стратегијата за реформи на правосудниот сектор присуствуваа и претставници на ОБСЕ, кои најавија редовно присуство и поддршка и во наредниот период.

М.В