Инфо за предметот
Надлежен суд: Основен суд Скопје 1
Бр. на предмет: КОК.Бр 47/12
СУДЕЊЕ
Почеток: 12 септември 2012г.
Судија: Весна Димишкова (претседавач)
Обвинител: Вилма Русковска
Обвинети:
- Игор Горански
- Сашко Стојчев
- Жан Железарски
- Горан Божиновски
- Јорданчо Михајлов
- Симеон Михаилов
- Стојан Паликрушев
- Тони Лесански
- Далибор Алексовски
- Милан Арсов
- Ванчо Ќорпашев
- Горан Кузмановски
- Сашко Стоименов (ослободен од обвинение)
- Димитар Јованов
- Ангел Андонов
- Горан Наунов (ослободен од обвинение)
„Детонатор“
Со затворски казни кои се движат од една година и три месеци до доживотен затвор, Основниот суд Скопје 1 на 24 декември 2013 година ги прогласи за виновсни сите 15-мина обвинети во овој предмет. Тие се осудени за: злосторничко здружување, обид за убиство, измама, лихварство, недозволено држење на оружје, непријавување и подготвување на кривично дело. Од нив, според обвинителството, шестмина се организатори, а останатите се припадници на злосторничка група која што правела криминал во источна Македонија, од Кочани до Виница. Апелациониот суд Скопје делумно ја потврди пресудата на Основниот суд Скопје 1, единствено преиначувајќи ја во делот за казните за обвинетите Сашко Стојчев, Жан Железарски, Горан Божиновски, Далибор Алексовски и Симеон Михаилов. Со одлуката Апелациониот суд, всушност на обвие обвинети им беа намалени казните за 6 месеци.
Образложен на помалку од 30 страници, во Обвинителниот акт што се води против обвинетите, сопственици на дискотеки, обезбедувачи и бизнисмени од Кочани, Виница и Крива Паланка, се посочува дека обвинетите за занимавале со лихварство, измама и насилството спрема населението во Кочани и Виница, за што беа и осудени.
Освен овие дела, организаторите на групата беа осудени и под обвинение дека во три наврати се обиделе да го убијат Драганчо Стоименов, нивни сограѓанин. Во два наврати, според обвинението, тие поставиле експлозивни направи во возилото на сопругата Стоименов, а третиот пат првообвинетиот Игор Горански со ловна пушка со возило го бркал оштетениот во центарот на Скопје.
Обвинителство: Тепачките и расправиите кулминирале до обид за убиство
Обвинителството неколкуте обиди за убиство ги објаснува на начин што претходеле расправии и тепачки меѓу оштетениот ДраганчоСтоименов и организираната група. Во обвинението стои дека обвинетите Игор Горански, Стојан Паликрушев, Сашко Стојчов,Горан Божиновски, Жан Железарски, Симеон Михаилов, Јорданчо Михајлов и Тони Лесански подолг временски период имале нарушени односи со оштетениот Драганчо Стоименов, кои ескалирале бидејчи според сведочењето на обвинетите, Драганчо Стоименов им ги запалил возилата. Според обвинителството ова било причина тие да се договараат да најдат лице кое за паричен надомест од 30.000 до 50.000 евра ќе го лиши од живот оштетениот.
Понатаму, во обвинението стои дека обвинетите давале пари на заем на луѓе кои се наоѓаат во тешка финансиска состојба и искористувајќи ја ситуацијата им наплаќале месечна камата од 15 %. Оштетените лица поради големата камата секој месец ги плаќале 15% каматата од долгот, но не можеле да го исплатат целиот долг кој обично изнесувал од 1000 до 5000 евра. На овој начин според наводите во обвинението, обвинетите секој месец прибавувале паричен надомест.
Полициска акција „Детонатор“ што се одвиваше во неколку градови во источниот дел на Македонија резултираше со 13 разрешени полициски началници и командири, запленети 1000 покер апарати и решетки за 14 лица. Заплената на покер апарати остана надвор од овој судски процес.
Тек на судењето
- 24.12.2013 – Судијката во „Детонатор“: Не ви се плашам! И да летнам како гулаб, друг судија ќе ви суди
- 10.12.2013 – Просецот финишира, објава на одлуката на 24 декември
- 19.11.2013 – Измени во обвинението — отфрлено злосторничкото здружување за делото лихварство
- 12.11.2013 – Заврши вештачењето за наплатата на „Титан груп“
- 31.10.2013 – Вештачењето за оштетата на кочанските дуќанџии сѐ уште не е завршено
- 10.10.2013 – Оштетениот Драганчо Стоименов повторно во судница
- 11.09.2013 – Вештиот наод за оштетата на кочанските дуќанџии сè уште не е завршен
- 26.07.2013 – Судот во Виница четири години не закажува главен претрес во процесот против оштетениот Стоименов
- 16.07.2013 – Дуќанџии од Кочани непотребно плаќале обезбедување
- 26.06.2013 – Неочекуван пресврт – наместо пресуда, продолжува доказната постапка
- 12.06.2013 – Одбраната ги даде завршните зборови — пресуда на 26 јуни
- 11.06.2013 – Нема докази дека обвинетите се злосторничка група, тврдат адвокатите
- 10.06.2013 – Адвокатите уверуваат — нема докази за обид за убиство, ниту за закани и присилби
- 07.06.2013 – Одбраната и обвинителството со контра аргументи во завршните зборови — покер апаратите не се дел од предметот
- 29.05.2013 – Брачниот пар Стоименови бараат 250 илјади евра оштета од обвинетите
- 28.05.2013 – Рочиштето одложено од технички причини
- 23.05.2013 – Повлечен обвинителниот предлог против Марија Ќорпашева
- 16.05.2013 – Сведоците на обвинителството го потврдуваа планот за ликвидација на оштетениот, обвинетите тврдат дека сведоците лажат
- 14.05.2013 – Зад затворени врати неколку часови сведочеа двајца загрозени сведоци
- 08.05.2013 – Апсурдно е меѓусебно скараните обвинети да се злосторничка група, смета одбраната
- 25.04.2013 – Конфузен сведок го раскажа своето патешествие со позајмицата од обвинетите
- 15.04.2013 – Обвинетите негираа создавање и припаѓање на група лихвари
- 09.04.2013 – Ново обвинение и обвинителен предлог — двајца обвинети се ослободени од обвинение
- 27.03.2013 – Сопствениците на „Титан груп“ ја негираат поврзаноста на обвинетите со агенцијата
- 13.03.2013 – Тројца сведоци ги потврдија наводните закани на обвинетите кон оштетениот Стоименов
- 25.02.2013 – Тројца сведоци кои користеле обезбедување и земале позајмици од обвинетите негираат рекет и лихва
- 01.02.2013 – Еден од тројцата сведоци потврди дека обвинетите му нуделе обезбедување, сите негираа уцени
- 22.01.2013 – Самиот си побарав обезбедување и се беше во најдобар ред, тврди сведок на одбраната
- 30.11.2012 – Сведоците отстапија од исказот даден пред истражен судија – немало закани и камати
- 28.11.2012 – Судењето се одложи, сведоците наредниот пат ќе раскажуваат за нивната поврзаност со обвинетите
- 14.11.2012 – Рочиштето се одложи, не се појави ниту еден сведок
- 06.11.2012 – И оштетениот Драганчо Стоименов обезбедувал локали во Кочани
- 30.10.2012 – Не можев ништо да сторам, немав на кого да се пожалам, само седев и си трпев, тврди оштетениот кој според обвинителството бил жртва на рекет и лихварство од страна на обвинетите
- 25.10.2012 – Третообвинетиот по телефон и кажал дека дека првообвинетиот бара човек во Дупница што ќе го ликвидира нејзиниот сопруг, тврди оштетената
- 18.10.2012 – Обвинетите тврдат дека Стоименов лаже, адвокатите бараат прецизни одговори, не сведочење на чаршиски муабети
- 09.10.2012 – Главниот претрес се одложи, казнет е бранителот на петтообвинетиот
- 05.10.2012 – На оштетениот не му е јасно зошто преживувал тортура, но слушнал гласини дека тоа било зошто имал пари
- 20.09.2012 – Обвинетите тврдат дека разговарале за мед, протеини, ургенции за вработување кај сопругата на обвинетиот Кузмановски
- 18.09.2012 – Од куршуми за изработка на ѓердани до 3000 евра за спортски тикети, обвинетите тврдат дека не правеле криминал туку вршеле услуги
- 14.09.2012 – Обвинетите тврдат дека не се криминалци, ниту се обиделе да го убијат оштетениот Драганчо Стоименов
- 12.09.2012 – Прво и второобвинетиот имаат судски спор, негираат дека се здружиле и создале криминална група