Судскиот процес за случајот „Калдрма“ заврши со правоосилна пресуда според која вкупно 86 обвинети беа осудени на близу три и пол века затвор. Според пресудата од сведоците, обвинетите кои признаа, изведените докази прибавени од посебни истражни мерки и вештачењето, се утврдло дека сите обвинети се виновни. Во обемното обвинение од неколку стотици страници опишани се дејствијата на вработените во ЈП „Македонија пат“. Поконкретно истиот зборува за фалсификувани фискални сметки и организиран план што обвинетите 3 и пол години го спроведувале  на 6 патарини од Коридор 10, од Куманово, па се до Гевгелија. Меѓу 86-те обвинети се и двајцата функционери од Македонија пат кои според Обвинителството се главните лидери во организираниот криминал. 

Прво сведоци во „Змиско око 1“, сега обвинети

Шефот и неговиот заменик, 10 сменоводители, изработувачот на фалсификуваните сметки како и 80 инкасанти се осудени за тешки кривични дела, злоупотреба на службената положба и овластување од чл.353 од КЗ и фалсификување исправа од чл.378 од КЗ. Меѓу осудените има и поранешни сведоци на обвинителството, кои сведочеа против своите колеги во судскиот процес за акцијата „Змиско око 1“. Заменик раководителот и неговиот кумашин кои пред неколку години ги пријавиле колегите за незаконско работење во МВР, во овој предмет тие одговараат за истите кривични дела, злосторничко здружување, фалсификување исправа, злоупотреба на службена положба и овластување.

Обвинителството: Неколку организатори и 80 припадници на злосторничка група

Според обвинението, раководителот, неговиот заменик и 5 инкасанти создале група, на којашто и се приклучиле останатите 80 обвинети. Изработувачот на лажните фискални сметки кој според неговиот исказ, бил во директен контакт со вработено лице во ЈП „Македонија пат“, по нарачка изработувал фискални сметки за 6 патарини од Коридорот 10. Раководителот и неговиот заменик, го изработувале распоредот и ги распоредувале инкасантите на наплатните рампи. За фреквентните патарини, според обвинението, цената за наводното мито изнесувала од 2000 до 5000 евра.

Понатаму, според обвинителниот акт, организаторите имале 15 соработници кои работеле како инкасанти, а имале задача да врбуваат луѓе за да станат припадници на групата.Обвинителството објаснува дека  на тој начин плетеле мрежа од блиски луѓе кои соработуваат и стекнуваат против правна корист давајќи лажни сметки, а парите ги ставале в џеб. Потоа на главните организатори им давале дел од заработувачката.

Тек на судењето

• 23.05.2013 –  Близу три и пол века затвор за 86-те обвинети
• 24.01.2013 – Судскиот процес почнa од почеток, сите обвинети се во куќен притвор освен првообвинетиот
• 19.12.2012 – Рочиштето се одложи, се уште е во тек изборот на втор судија во судскиот совет
• 10.09.2012 – Агенцијата за државни патишта бара оштета од 107 милиони денари, но на виделина излегоа слабостите на системот на наплата
• 07.09.2012 – Почна тензично, заврши со радост, 27 обвинети решетките ги заменија со домашен кревет
• 26.07.2012 – Обвинетите повторно ги спомнуваа прасињата, телевизорот и тренерките
• 25.07.2012 – Обвинет – Сум имал понуди возачот да сака да плати пола-пола, но никогаш не сум наплатил така
• 24.07.2012 – Телевизор и прасиња за шефот, како подарок, а не мито
• 23.07.2012 – Раководителот и неговиот заменик негираа, изработувачот на лажните сметки ја призна вината