Според претседателот на Владата на РМ, Зоран Заев, во октомври ќе се гласаат решенијата кои ќе произлезат од работата на Советот за реформи во правосудството, а потоа ќе се реализира и нивната имплементација.

„Многу е важно брзо да се донесат усогласени и адаптирани законски решенија. Очекувам дека во октомври ќе се гласаат тие решенија, но најважна е имплементацијата. Таа зависи од секој поединец во правосудството, почнувајќи од судиите, обвинителите, стручните соработници, а транспарентноста и независноста се следниот чекор, кој го очекуваме од секој судија и обвинител за да можеме да очекуваме и независно судство и комплетна контрола од страна на граѓаните и правосудните органи во државава“, вели Заев, кој смета дека идните реформи ќе придонесат за сериозно зголемување на довербата на граѓаните во правосудството.

Премиерот рече дека довербата ќе се зголеми и доколку ниту еден судија не зависи од политичар, како што се случувало во минатото, и дека во втората фаза на реформите ќе има отчетност и мониторинг на сите заинтересирани во државата, каде што секоја судска  пресуда јавно ќе се објавува, а граѓаните ќе можат да даваат директни коментари на работата.