По повод отпочнувањето на процесот за креирање на Законот за млади, во Собранието на Република Македонија се одржа јавен настан на кој се дискутираше за начинот на креирање на Законот, како и за потребите, за правата и за обврските на младите кои треба да бидат уредени со овој закон.

Модератор на овој настан беше пратеничката Ивана Туфегџиќ, а на настанот говореа: потпретседателката на Собранието на Република Македонија, Фросина Ташевска-Ременски; директорот на Агенција за млади и спорт, Дарко Каевски; пратеничката Невенка Стаменковска; претседателот на Националниот младински совет на Македонија, Блажен Малески; пратеникот Костадин Костадинов; извршниот директор на Коалицијата СЕГА, Зоран Илиески; пратеникот Агим Шаќири и пратеничката Теута Биљаљи.

Процесот за креирање на Законот за млади започнува на иницијатива на Клубот за младински прашања и политики при Собранието на Република Македонија. Креирани се три работни групи, од кои едната е составена од пратеници членови на Клубот за младински прашања и политики, втората е предводена од Агенцијата за млади и спорт, а составена од претставници на институциите на Владата на Република Македонија и третата е составена од претставници на граѓански организации членови на најголемите младински чадор-организации во државата.

По серијата средби, трите групи креираа предлог-процес за креирање на Закон за млади, кој обезбедува широк, инклузивен и сеопфатен пристап. На креирањето на овој закон ќе му претстојат широки консултации на локално и на национално ниво, јавни трибини и дискусии со академската и експертската фела, институционални мапирања, како и серија на јавни расправи. Ова е прв случај на отпочнување на легислативен процес со вклученост на сите засегнати страни.

М.В