Кривични пријави против обвинители од Специјалното јавно обвинителство
„Една од кривичните пријави е против три познати лица - обвинители и неколку непознати лица. Три од кривичните пријави се против неколку непознати лица. Две од кривичните пријави се против двајца обвинители и неколку непознати лица“
Вкупно шест кривични пријави се поднесени до Основното јавно обвинителство Скопје кои што се однесуваат на Специјалното јавно обвинителство, тимот и нивната работа.
Како што информираат од Обвинителството, сите кривични пријави се поднесени од различни физички лица, а се однесуваат за кривично дело „Малтретирање во вршење на службата“ од член 143 од Кривичниот законик.
„Една од кривичните пријави е против три познати лица – обвинители и неколку непознати лица. Три од кривичните пријави се против неколку непознати лица. Две од кривичните пријави се против двајца обвинители и неколку непознати лица“, се наведува во одговорот од Обвинителството.
Во Основното јавно обвинителство за гонење на организиран криминал и корупција, пак, е поднесена една кривична пријава против едно лице, вработено во МВР, за строено кривично дело „Незаконито влијание врз сведоци“ од член 368а од Кривичниот законик.
Поднесените кривични пријави се распределени за натамошно постапување кај надлежни обвинители, велат од Обвинителството.
Специјалната јавна обвинителка, Катица Јанева, вчера не сакаше да ги коментира кривичните пријави поднесени против лица вработени во СЈО, а за кои пишуваа медиумите викендов.
Денеска од прес-службата на СЈО во однос на кривичните пријави, кои се однесуваат на нивната работа, велат дека постапувале согласно законските прописи.
„Дополнителни информации ќе добиете на најавената прес-конференцијата“, велат од Специјалното јавно обвинителство.