Денови на одбележување 10 години од постоењето на Академијата за судии и јавни обвинители „Павел Шатев“
Академијата за судии и јавни обвинители „Павел Шатев“ денеска започнува со одбележувањето на десетгодишнината од своето основање со одржување серија работни настани.
Од Академијата велат дека деновите на одбележување 10 години од постоењето на Академијата за судии и јавни обвинители „Павел Шатев“ ќе бидат одбележени преку одржување на 10 дена работни настани, меѓу кои и регионалната конференција „Јакнење на регионалната соработка меѓу институциите за правосудна обука од Западен Балкан“, која ќе се одржи на 24 и 25 ноември во Скопје.
На регионалната конференција ќе присуствуваат директорите на институциите за правосудна обука од Хрватска, Турција, Србија, Црна Гора, Албанија и од Косово, директорите на Европската академијата за јавна администрација (ЕИПА) од Луксембург и Академијата за европско право (ЕРА), генералниот секретар на Европската мрежа за правосудна обука ЕЈТН, претставници од Советот на Европа, Регионалниот центар за соработка од Хрватска, како и претставници на органите и телата на Академијата за судии и јавни обвинители.
Првиот настан од серијата на работни настани ќе се одржи денес и утре и е посветен на темата „Граѓанско-правна заштита на правата од интелектуална сопственост“, а во рамките на твининг-проектот „Зајакнување на спроведување на правата од интелектуална сопственост“ и во соработка со Канцеларијата за патенти и трговски марки од Данска.
На денешниот настан, излагања поврзани со темата ќе имаат Зане Петерсон, судија на Одделот за граѓански случаи на Врховниот суд на Република Латвија, Еирлинг Вестергард, заменик-јавен обвинител за сериозен економски криминал, назначен како национален експерт во Канцеларијата за хармонизација на внатрешниот пазар во Данска и Маринела Јакасановска, судија на Основниот суд Скопје 2 Скопје.
Академијата за судии и јавни обвинители, како јавна установа за прием и стручно усовршување на кандидатите за судии и јавни обвинители, врши континуирана обука и унапредување на стручноста на судиите и јавните обвинители, континуирана обука на стручните служби во судството и јавното обвинителство, како и обука на субјектите кои учествуваат во спроведувањето на законите од областа на правосудството.
Академијата, исто така, врши и аналитичка дејност од областа на правосудната теорија и практика. Преку почетната и континуираната обука, велат од Академијата, се дава придонес во градењето на европски профил на судиите и јавните обвинители, но и на судската и обвинителската администрација, со користење на модерни методи за усовршување на нивните знаења.
Целта на основање на Академијата, се пропишува во Законот за Академијата на судии и јавни обвинители, е да се обезбеди професионално, независно, непристрасно и ефикасно извршување на судиската и јавнообвинителската функција, како и стручно и ефикасно извршување на работите на стручните служби во судството и јавното обвинителство.
М.В
