/ Прочитано:

594

Масовно апсење на полициски службеници во Турција — се сомничат дека го прислушкувале Ердоган

Среда, 23 јули 2014 – Во Турција се уапсени 55 високи по ранг полициски чиновници. Како и лани, кога беше извршен сличен бран апсења, и сега турскиот премиер Ердоган претпоставува дека тие се вмешани во завера против него и владата, пренесува „Дојче Веле“.

Турските медиуми објавија извештаи за акција на територијата на целата земја, во која се уапсени 55 високи по ранг полициски службеници. Како што јавуваат радио станици и агенциии, тие во рамките на истрагата против противниците на турскиот премиер Реџеп Таип Ердоган, се осомничени за корупција и злоупотреба на службената положба. Наводно тие, под параванот на борба против тероризмот, незаконски прислушувале членови на владата и самиот премиер Ердоган. Акцијата се толкува како удар против движењето на исламскиот проповедник и ривал на Ердоган, Фетулах Ѓулен.

Заднината е борбата за превласт меѓу ердогановата исламистичко-конзервативна Партија за правда и развој, АКП и движењето на Ѓулен, кој живее во егзил, а има свои бројни приврзаници, првенствено во судството и полицијата. Поради наводна завера против него и неговата влада, Ердоган кон крајот на минатата година нареди масовно принудно преместување на полициски службеници, судии и државни обвинители.

Акцијата следеше откако истанбулските државни обвинители во декември наредија апсење на бројни политичари и бизнисмени од најблиското опкружување на Ердоган и владата. Тие беа обвинети за вмешаност во широко разгранет корупциски скандал: меѓу другото, за учество во бизниси со злато со Иран, поткуп и издавање незаконски градежни дозволи. Последица на скандалот беше реконструкцијана турската влада.