Програмата на првата Летна школа по кривично право и човекови права беше поделена на две секции, едната беше посветена на човековите права – а другата на кривичното право. Во секцијата „Човекови права“ учествуваа 20 студенти, а во секцијата  „Кривично право“ учество земаа 25 студенти.

Студентите полагаа и завршен испит со цел да се потврди знаењето што го стекнаа во рамките на Школата и сите добија сертификати за учество. Сертификатите беа издадени од страна на Мисијата на ОБСЕ, Универзитетот „Гоце Делчев” во Штип и Државниот универзитет во Тетово.

Школата, истакнуваат од Правниот факултет при УГД, се одржа во Охрид, а ја организираа правните факултети при Универзитетот „Гоце Делчев“ во Штип и Државниот универзитет во Тетово, со поддршка од Мисијата на ОБСЕ во Скопје.

Во подготвителниот период беше формиран Организационен одбор на Школата, кој го сочинуваа проф. д-р Јован Ананиев и проф. д-р Страшко Стојановски од Правниот факултет при Универзитетот „Гоце Делчев“ во Штип, проф. д-р Агим Нухиу и проф. д-р Насер Адеми од Државниот универзитет во Тетово и доц. д-р Жанета Попоска и м-р Томе Шеќерџиев од Мисијата на ОБСЕ во Скопје.

Темите што се обработуваа на Летната школа се однесуваа на човековите права, заштитата од дискриминација, говорот на омраза и криминалот од омраза, правата на жените, децата и лицата со попреченост, правото на работа, меѓународниот систем на правна заштита на човековите права, како и теми поврзани со кривичното материјално и процесно право.

Исто така, беа вклучени и теми кои се однесуваат на мултикултурализмот и моделите на градење доверба во мултиетничко општество.

Целите на школата беа насочени кон подобрување на знаењата во доменот на човековите права, ефикасни институции, ефикасно носење на политички одлуки, кривичното право и моделите за добро управување и меѓуетнички односи; подобрување на вештините за ефикасно препознавање на клучните предизвици во областа на човековите права и кривичното право и предлагање на модели за нивно надминување, зголемување на чувствителноста и свесноста на студентите за прашања што се однесуваат на антидискриминацијата и намалувањето на говорот на омраза и феноменот на криминал од омраза и почитувањето на етничката.

Исто така, целите на школата беа насочени и кон јазичната и религиозната различност, развивање на вештини за критичко размислување во процесот на учење на предмети од областа на правните и политичките науки и социологијата, поврзување на студентите од различни правни факултети како потенцијал за идни активности иницирани од нивна страна, во коишто може да се јават како носители, и кумулација и трансфер на ЕКТС кредити меѓу универзитетите.

На Летната школа како предавачи учествуваа  проф. д-р Ферат Полиси, редовен професор и декан на Правниот факултет при ДУТ; проф. д-р Страшко Стојановски, вонреден професор на Правниот факултет при УГД; доц. д-р Ана Никодиновска-Крстевска, доцент на Правниот факултет при УГД; доц. д-р Жанета Попоска, офицер за владеење на право при Мисијата на ОБСЕ во Скопје и доцент на Правниот факултет при УГД; доц. д-р Агим Нухиу, доцент на Правниот факултет при ДУТ; проф. д-р Јован Ананиев, редовен професор и декан на Правниот факултет при УГД; проф. д-р Лазар Нанев, вонреден професор на Правниот факултет при УГД, судија; проф. д-р Сеадин Џафери, професор на Економскиот факултет при ДУТ; м-р Томе Шеќерџиев, офицер за владеење на право при Мисијата на ОБСЕ во Скопје;  проф. д-р Насер Адеми, редовен професор на Правниот факултет при ДУТ; доц. д-р Лазар Јовевски, доцент на Правниот факултет при УКИМ; проф. д-р Васфи Доко, редовен професор на Правниот факултет при ДУТ и м-р Славица Чубриќ, постар правен асистент при Мисијата на ОБСЕ во Скопје.

М.В